Türkmenistan, Azerbaýjan we Özbegistan ynsanperwer we ekologiýa dialogyny giňeldýärler
Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewanyň, Azerbaýjan Respublikasynyň Geýdar Aliýew adyndaky gaznasynyň wise-prezidenti Leýla Aliýewanyň hem-de Özbegistan Respublikasynyň Prezidentiniň Diwanynyň ýolbaşçysy Saida Mirziýoýewanyň gatnaşmagynda «Ene tebigat» atly halkara sungat sergisiniň açylyş dabarasy boldy. Bu çäre Aşgabadyň halkara ynsanperwer we ekologik başlangyçlaryň abraýly merkez hökmünde barha artýan ornuny görkezdi.
Serginiň açylyşyndan öň «Oguzkent» myhmanhanasynda Oguljahan Atabaýewanyň, Leýla Aliýewanyň hem-de Saida Mirziýoýewanyň üçtaraplaýyn duşuşygy geçirildi. Taraplar umumy taryhy köklere, ruhy we medeni gymmatlyklara esaslanýan döwletara gatnaşyklarynyň doganlyk we hoşniýetli goňşuçylyk häsiýetini nygtadylar.
Gepleşikleriň dowamynda howanyň üýtgemegine durnuklylygy üpjün etmek, Türkmenistanyň Milli tokaý maksatnamasyny durmuşa geçirmek, howanyň üýtgemegi bilen bagly tehnologiýalar boýunça Sebitleýin merkezi döretmek, şeýle hem ýaş nesilde tebigata aýawly garamak medeniýetini terbiýelemek meselelerine aýratyn üns berildi.
Leýla Aliýewa we Saida Mirziýoýewa myhmansöýerlik hem-de saparyň ýokary guramaçylyk derejesi üçin Türkmenistanyň ýolbaşçylygyna minnetdarlyk bildirdiler. Şeýle hem olar Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň çagalaryň saglygyny goramak we durmuş taýdan goldamak babatynda alyp barýan giň gerimli işlerini bellediler.
Ýokary derejeli myhmanlaryň medeni maksatnamasy Türkmenistanyň Döwlet çeperçilik akademiýasyndaky sergi ekspozisiýasyna, Türkmen halysynyň milli muzeýine we baý milli däpleri häzirki zaman meýilleri bilen utgaşdyrylan milli lybaslaryň görkezilişine baryp görmek bilen dowam etdi.
