Türkmenistanyň sebitlerinde durnukly ösüş maksatlary ýerli şertlere uýgunlaşdyrylýar
Türkmenistanyň welaýatlarynda Durnukly ösüş maksatlaryny (DÖM) ýerli şertlere uýgunlaşdyrmaga bagyşlanan amaly okuw maslahatlarynyň tapgyry tamamlandy. BMG-niň Ösüş maksatnamasy bilen Türkmenistanyň Maliýe we ykdysadyýet ministrliginiň bilelikde guramagynda geçirilen bilermenler sessiýasy Mary, Lebap we Daşoguz welaýatlaryny, şeýle hem Türkmenbaşy şäherini öz içine aldy.
Duşuşyklaryň esasy maksady BMG-niň ählumumy ösüş ugurlaryny ýerli häkimlikler, telekeçiler we degişli hünärmenler üçin amaly gurala öwürmekden ybarat boldy. Gatnaşyjylar umumy görkezijileriň ýerine her sebitiň anyk zerurlyklaryna, şol sanda serişdelerden rejeli peýdalanmaga, durmuş infrastrukturasyny ösdürmäge, kiçi telekeçiligi goldamaga we täze iş orunlaryny döretmegi ara alyp maslahatlaşdylar.
Toparlaýyn işleriň dowamynda ýerli häkimlikleriň, Türkmenistanyň Senagatçylar we telekeçiler birleşmesiniň, bilim edaralarynyň hem-de jemgyýetçilik guramalarynyň wekilleri öz sebitleri üçin ileri tutulýan ugurlaryň sanawyny düzdüler. Bu teklipler ýerli häkimiýetlere sebit býujetlerini has takyk meýilleşdirmäge, netijeli dolandyryş çözgütlerini kabul etmäge we ilatyň ýaşaýyş derejesine obýektiw baha bermäge ýardam eder.
Bu çemeleşme 2030-njy ýyla çenli döwür üçin ählumumy ösüş gün tertibini nazaryýetden amaly özgertmelere geçirmäge mümkinçilik berýär. Şunda her welaýat özboluşly mümkinçiliklerini we zerurlyklaryny göz öňünde tutup, ykdysadyýetini ösdürýär.
