BMG Ýemendäki ynsanperwer ýagdaýyň has-da ýaramazlaşýandygyny duýdurdy
Ýemende dowam edýän çaknyşyklar we ilatyň köpçülikleýin göçmegi ynsanperwer ýagdaýy, aýratyn-da Taiz welaýatynda, has-da agyrlaşdyrýar. Bu barada duşenbe güni BMG-niň Ynsanperwer meseleleri utgaşdyrmak boýunça edarasy habar berdi.
Halkara Migrasiýa Guramasynyň maglumatlaryna görä, awgust aýynyň başyndan bäri ýurt boýunça takmynan 216 müň adam öýüni taşlamaga mejbur boldy. Olaryň 172 müňden gowragy diňe Taiz welaýatynyň ýaşaýjylarydyr.
BMG we onuň ynsanperwer hyzmatdaşlary duşenbe gününe çenli takmynan 143 müň adama azyk, arassaçylyk serişdeleri we pul kömegi görnüşinde gyssagly ýardam berdi. Emma zerurlyklaryň artmagy, elýeterlilikdäki çäklendirmeler we serişdeleriň ýetmezçiligi kömek işlerini kynlaşdyrýar.
Taiz welaýatyndaky ýagdaý aýratyn alada döredýär. Esasy ýollaryň ýapylmagy ilatyň hereketine, haryt üpjünçiligine we ynsanperwer kömegiň eltilmegine päsgel berýär. Taiz — Aden ýolunyň hem ýapylmagy azyk, ýangyç, suw we derman serişdeleriniň ýetmezçiligine hem-de bahalaryň ýokarlanmagyna sebäp bolýar.
BMG-niň maglumatyna görä, ýaşaýyş jaýlarynyň, arassaçylyk şertleriniň, azygyň we lukmançylyk hyzmatlarynyň ýetmezçiligi göçürilen aýallar we gyzlar üçin goşmaça töwekgelçilik döredýär. Maliýeleşdirmegiň azalmagy sebäpli Ýemen boýunça aýallar we gyzlar üçin döredilen howpsuz ýerleriň 72 göterimi ýapyldy.
Parahat ilatyň arasynda pidalaryň sany hem artýar. Awgust aýynyň başyndan bäri azyndan 54 adam heläk boldy, olaryň ýarysy çagalar. Ýene 171 adam ýaralandy, şol sanda 107 aýal we çaga.
CCTV+ habar bermegine görä, BMG ynsanperwer kömegi utgaşdyrmagy dowam etdirýär we ähli taraplary halkara ynsanperwer hukugyny berjaý etmäge, parahat ilaty we raýat infrastrukturasyny goramaga hem-de kömek guramalary üçin howpsuz we päsgelçiliksiz elýeterliligi üpjün etmäge çagyrýar.
