TDU we Firdöwsi adyndaky Maşat uniwersiteti hyzmatdaşlyk hakynda Ähtnama gol çekdiler
10-njy oktýabrda Aşgabatda «Berkarar döwletiň täze eýýamynyň Galkynyşy döwründe saglygy goraýyş, bilim we sport» atly halkara sergisi we ylmy maslahaty açyldy. Forumyň ilkinji gününiň esasy wakasy Magtymguly adyndaky Türkmen döwlet uniwersiteti bilen Eýranyň Firdöwsi adyndaky Maşat uniwersitetiniň arasynda özara düşünişmek hakynda Ähtnama gol çekilmegi boldy.
Resminama Magtymguly adyndaky TDU-nyň rektory Orazgeldi Öwezsähedow we Firdöwsi adyndaky uniwersitetiň rektory Abdulreza Jawan Jafari Bojnordi gol çekdiler. Dabaraly çärä Eýran Yslam Respublikasynyň Türkmenistandaky Adatdan daşary we Doly ygtyýarly ilçisi Ali Mojtaba Ruzbehani hem-de medeniýet boýunça geňeşçisi Abdolreza Abbasi gatnaşdylar.
Täze ylalaşyk bilelikdäki ylmy barlaglary, akademiki alyş-çalyşlary we usulyýet taslamalaryny ösdürmäge gönükdirilendir. Taraplar Türkmenistandaky ýokary okuw mekdeplerinde pars diliniň we edebiýatynyň okadylyşyny kämilleşdirmäge aýratyn üns bererler.
Söwda-senagat edarasynyň sergi zalynda ýaýbaňlandyrylan giň gerimli ekspozisiýa alymlary, lukmanlary, mugallymlary, şeýle hem ýurdumyzyň we daşary ýurtlaryň kompaniýalarynyň wekillerini bir ýere jemledi. Serginiň açylyş dabarasyna Mejlisiň ýolbaşçylary, Hökümet agzalary, diplomatik wekilhanalaryň we halkara guramalaryň ýolbaşçylary gatnaşdylar.
Eýranyň öňdebaryjy ylym-bilim merkezleriniň biri bolan Firdöwsi adyndaky Maşat uniwersiteti bilen hyzmatdaşlyk Türkmenistanyň ýokary bilim ulgamynyň halkara gatnaşyklaryny giňeltmäge, talyplar we ýaş alymlar üçin täze mümkinçilikleri döretmäge ýardam berer.
ORIENT
Mowzuk boýunça:
Aşgabatda saglygy goraýyş, bilim we sport ulgamynda halkara sergisi geçirilýär
Aşgabatda Malaýziýanyň öňdebaryjy uniwersitetleriniň bilim mümkinçilikleri tanyşdyryldy
