Hytaý robotlary World AI Summit sammitinde öňdebaryjy mümkinçiliklerini görkezdi
Hytaý kompaniýalary Amsterdamda geçirilen World AI Summit sammitinde emeli aň we robototehnika ulgamyndaky öňdebaryjy işläp taýýarlamalaryny tanyşdyrdylar. Esasy sergi eksponatlarynyň hatarynda Unitree Robotics kompaniýasynyň adam şekilli we dört aýakly robotlary bolup, olar öz mümkinçiliklerini myhmanlara görkezdiler.
Çarşenbe we penşenbe günleri geçirilen sammit emeli aňyň howpsuzlygy, täze algoritmler, emeli aň agentleri hem-de tehnologiýalaryň işewürlikde amaly taýdan ornaşdyrylmagy meselelerine bagyşlandy.
Bu pudagyň wekilleri emeli aňyň ösdürilmeginde Hytaýyň barha artýan ornuny bellediler. Nvidia kompaniýasynyň wekili Saýmon Si DeepSeek, Moonshot we Alibaba ýaly hytaýly işläp düzüjileriň gazananlaryny aýratyn nygtap, olaryň täze algoritmleriň ösdürilmegine ýetirýän täsirine ünsi çekdi.
Hytaýyň emeli aň pudagynyň giňelmeginiň çäginde World AI Summit sammitiniň guramaçylary indiki ýyl Hytaýda bu çäräniň aýratyn görnüşini geçirmek mümkinçiligini ara alyp maslahatlaşmak üçin Shanghai International Exhibition Group guramasynyň wekillerini çagyrdylar.
Shanghai International Exhibition Group guramasynyň prezidenti Sýuý Szýa taraplaryň halkara sammitine gatnaşmak üçin has köp hytaý kompaniýalaryny we wekiliýetlerini çekmegi hem meýilleşdirýändiklerini habar berdi.
CCTV+-nyň habar bermegine görä, Hytaý robotlarynyň, algoritmleriniň we emeli aň ulgamlarynyň ösdürilmegi ýurduň kompaniýalarynyň halkara tehnologiýa meýdançalaryndaky gatnaşygyny güýçlendirýär hem-de emeli aň ulgamynda hyzmatdaşlyk mümkinçiliklerini giňeldýär.
