«Awaza» milli syýahatçylyk zolagynda Türkmenistanyň GDA-da başlyklyk etmeginiň çäklerinde Halkara zenanlar forumy geçirilýär
Parahatçylygy pugtalandyrmak, ählumumy ösüşiň adalatly nusgasyny gözlemek we halkara syýasatyny ynsanperwerleşdirmek 7-nji oktýabrda «Awaza» milli syýahatçylyk zolagynda geçirilýän «Parahatçylygy saklamakda we durnukly ösüşe ýetmekde zenanlaryň orny» atly Halkara forumyň esasy meseleleri boldy. Arkalaşygyň ýurtlaryndan, Aziýadan we Ýewropadan wekilleri bir ýere jemlän bu abraýly pikir alyşma meýdançasy GDA ýurtlarynyň döwlet Baştutanlarynyň sammitiniň öňüsyrasynda geçirilýär.
Plenar mejlisiň moderatorlygy Türkmenistanyň Mejlisiniň Başlygy Dünýägözel Gulmanowa tarapyndan ýerine ýetirildi. Milli parlamentiň ýolbaşçysy forumyň geçirilmeginiň döwlet durmuşynda zenanlaryň derejesini ýokarlandyrmak, eneligi we çagalygy goramak, durmuş hukuklaryny üpjün etmek hem-de raýatlaryň intellektual mümkinçiliklerini açyp görkezmek boýunça amaly tejribe alyşmak üçin täze we netijeli platformany döretmek zerurlygy bilen şertlendirilendigini belledi. Halkara tagallalaryň birleşdirilmegi hem sebitde, hem-de ählumumy derejede özara ynanyşmagy we howpsuzlygy pugtalandyrmagyň möhüm şerti bolup durýar.
Russiýa Federasiýasynyň Federal Ýygnagynyň Federasiýa Geňeşiniň Başlygy Walentina Matwiýenko öz çykyşynda Türkmenistanyň halkyny Garaşsyzlygyň 35 ýyllygy bilen gutlady hem-de zenanlaryň öz mümkinçiliklerini doly durmuşa geçirmegi üçin ähli şertleriň döredilen «Awaza» milli syýahatçylyk zolagynda forumyň geçirilmeginiň çuňňur many-mazmuna eýedigini belledi.
Russiýanyň parlamentiniň ýokarky palatasynyň ýolbaşçysy häzirki zaman ählumumy gün tertibine hut zenanlaryň konstruktiw dialogy we ylalaşyga ymtylyşy getirip bilýändigine aýratyn ünsi çekdi. Şeýle hem Walentina Matwiýenko duşuşyga gatnaşyjylary 2027-nji ýylyň güýzünde Sankt-Peterburg şäherinde geçiriljek V Ýewraziýa zenanlar forumyna gatnaşmaga çagyrdy.
Plenar mejlisiň işine Azerbaýjandan, Belarusdan, Eýrandan, Gazagystandan, Gyrgyzystandan, Täjigistandan, Türkiýeden, Özbegistandan wekiller, şeýle hem Birleşen Milletler Guramasynyň Türkmenistandaky Hemişelik utgaşdyryjysy gatnaşdy. Russiýanyň parlament toparynyň düzümine Federasiýa Geňeşiniň başlygynyň orunbasary Inna Swýatenko, komitetleriň ýolbaşçylary Liliýa Gumerowa we Wladimir Jabarow girdiler. Geçirilen maslahatlaryň netijeleri boýunça işlenip taýýarlanyljak teklipler we başlangyçlar GDA-nyň giňişliginde durnukly ösüş strategiýalaryny mundan beýläk hem ilerletmek üçin mazmunlaýyn esas bolup hyzmat eder.
