Nobel baýragynyň eýesi Konstantin Nowosýolow ylmy açyşlarda adamyň esasy ornuny saklamaga çagyrdy

Fizik we Nobel baýragynyň eýesi Konstantin Nowosýolow emeli aňyň çalt ösýän şertlerinde hem adamyň duýgurlygynyň we döredijilikli pikirlenmesiniň ylmy barlaglaryň merkezinde galmalydygyny aýtdy.

Onuň sözlerine görä, emeli aň eýýäm güýçli gurala öwrüldi we ylmyň köp ugurlaryny düýpli üýtgetdi. Şeýle-de bolsa, onuň pikirine görä, ylmy barlaglaryň döredijilikli bölegi adamyň ygtyýarynda galmalydyr.

Nowosýolow soňky aýlarda emeli aň ulgamlarynyň çylşyrymly matematiki meseleleri çözmäge ukyplydygyny görkezendigini belläp, munuň geljekde uly dil modelleriniň ylmy açyşlarda eýelejek orny baradaky çekişmeleri güýçlendirendigini aýtdy.

Şol bir wagtyň özünde alym emeli aň tehnologiýalaryna aşa derejede bagly bolmagyň töwekgelçilikleri barada duýdurdy. Ol alymlaryň alnan netijeleri barlamalydygyny, hakyky ýalňyşlyklary ýüze çykarmalydygyny we ygtybarly netijeleri modelleriň «galýusinasiýalaryndan» tapawutlandyrmalydygyny nygtady.

Nowosýolow täze tehnologiýalary ulanmak üçin jogapkärçiligiň diňe alymlaryň üstüne düşmeli däldigini hem aýtdy. Onuň pikirine görä, emeli aňyň howpsuz we jogapkärçilikli ulanylmagy bilen bagly meseleleri ylmy jemgyýetçilik, döwlet we jemgyýet bilelikde çözmelidir.

CCTV+-nyň habar bermegine görä, Nowosýolow emeli aňy ylym üçin möhüm gural hökmünde görýär, emma netijeleri düşündirmekde, döredijilikde we karar kabul etmekde adamyň gözegçiligini saklamagyň zerurdygyny nygtaýar.