Tailanddaky suw joşmalary 42 welaýata täsir etdi, sekiz adam aradan çykdy
Tailandda 16-njy sentýabrdan bäri dowam edýän giň gerimli suw joşmalary ýurduň uly bölegine täsir etdi. Häkimiýetler adamlaryň heläk bolandygy, millionlarça adamyň tebigy betbagtçylykdan zyýan çekendigi we täze güýçli ýagyşlaryň howpunyň saklanyp galýandygy barada habar berýär. Şol bir wagtyň özünde Bangkogyň ýagdaýy kem-kemden durnuklaşýar.
Tailandyň Tebigy betbagtçylyklaryň öňüni almak we olaryň netijelerini ýok etmek müdirliginiň maglumatlaryna görä, 16–28-nji sentýabr aralygynda suw joşmalary 42 welaýata ýaýrady we takmynan 1,8 million adama täsir etdi. Duşenbe gününe çenli sekiz adamyň aradan çykandygy habar berildi.
Tebigy betbagtçylyk häzirem Bangkok bilen birlikde 28 welaýata täsir edýär. Ýagdaý ýurduň merkezi, demirgazyk, gündogar we demirgazyk-gündogar sebitlerinde has çylşyrymly.
Şenbe güni Bangkogyň gubernatory Çadçart Sittipunt paýtagtyň tutuş çägini suw joşmasyndan zyýan çeken sebit hökmünde yglan etdi. Bu karar takmynan 48 sagatlap üznüksiz ýagyşlaryň ýagmagy netijesinde giň gerimli suw basmalarynyň we ulag gatnawynda çynlakaý bökdençlikleriň ýüze çykmagyndan soň kabul edildi.
Duşenbe güni Tailandyň Meteorologiýa müdirligi Bangkokda we oňa ýanaşyk sebitlerde ygalyň güýjüniň peselendigini habar berdi. Gubernatoryň aýtmagyna görä, paýtagtdaky umumy ýagdaý gowulaşdy, merkezi etraplarda ýygnanan suwuň derejesi ep-esli pese düşdi.
Şeýle-de bolsa, Bangkogyň şäher çetlerinde güýçli suw basmalary dowam edýär. Çadçart Sittipunt käbir ýerlerde suw joşmasynyň doly çekilmeginiň iki-üç hepde dowam edip biljekdigini aýtdy. Onuň sözlerine görä, suw joşmasy sebäpli hut Bangkogyň özünde adamlaryň aradan çykandygy barada maglumat gelip gowuşmady.
Häkimiýetler Bangkokda we oňa ýanaşyk üç welaýatda duşenbe we sişenbe günlerini dynç günleri diýip yglan etdiler. Suw joşmalarynyň ulag gatnawyna we beýleki ulgamlara ýetiren täsirini azaltmak maksady bilen döwlet edaralarynyň we mekdepleriň işi wagtlaýyn togtadyldy.
Meteorologiýa müdirligi duşenbe güni Tailandyň demirgazyk, merkezi we gündogar sebitleriniň käbir ýerlerinde güýçli we örän güýçli ýagyşlaryň dowam etmegine garaşylýandygyny çaklaýar.
“CCTV+”-niň habar bermegine görä, Tailandda 16-njy sentýabrdan bäri dowam edýän suw joşmalary 42 welaýata we takmynan 1,8 million adama täsir etdi. Betbagtçylyk zerarly sekiz adam aradan çykdy.
