Dünýä Hytaýyň we ABŞ-nyň liderleriniň duşuşygyndan oňyn netijelere garaşýar
Hytaýyň we ABŞ-nyň liderleriniň öňde boljak duşuşygyna diňe bir iki ýurduň arasyndaky gatnaşyklaryň möhüm tapgyry hökmünde däl, eýsem halkara gün tertibine täsir edip biljek waka hökmünde hem garalýar. Birleşen Milletler Guramasynda Pekin bilen Waşingtonyň arasyndaky gepleşikleriň dowam edýän düşünişmezliklere garamazdan, ählumumy derejesindäki meseleler boýunça umumy garaýyşlary tapmaga ýardam berjekdigine umyt bildirilýär.
Hytaý Halk Respublikasynyň Başlygy Si Szinpin ABŞ-nyň Prezidenti Donald Trampyň çakylygy boýunça 23–25-nji sentýabr aralygynda ABŞ-a döwlet saparyny amala aşyrar. Saparyň dowamynda liderler Hytaý–ABŞ gatnaşyklarynyň esasy meseleleri, şeýle hem dünýäde parahatçylygyň we ösüşiň üpjün edilmegi bilen bagly ugurlar boýunça giňişleýin pikir alyşarlar.
«Bu iki ýurduň arasyndaky gatnaşyklary täze derejä çykaryp biljek örän taryhy sapar bolar. Hemişe belleýşimiz ýaly, Hytaý bilen ABŞ-nyň ikitaraplaýyn gatnaşyklary diňe iki ýurt bilen çäklenmeýär, olar dünýä ähmiýetine eýedir. Elbetde, Birleşen Milletler Guramasynda hem adamlar bu duşuşyga uly gyzyklanma bilen garaşýarlar we bu taryhy saparyň oňyn netijeleri berjekdigine hemmeler umyt edýär» diýip, Hytaýyň BMG-niň ýanyndaky hemişelik wekili Fu Sýun Hytaýyň global telewideniýe ulgamyna (CGTN) beren interwýusynda aýtdy.
Onuň sözlerine görä, Hytaý bilen ABŞ terrorçylyga garşy göreş we ýadro ýaraglarynyň ýaýramagynyň öňüni almak ýaly ugurlarda hyzmatdaşlyk edip, BMG-niň işiniň netijeliligini ýokarlandyrmaga we halkara hyzmatdaşlygyny pugtalandyrmaga goşant goşup biler.
«Birleşen Milletler Guramasynda Hytaý we ABŞ dünýäniň iň iri iki ykdysadyýetidir, şeýle hem olar Howpsuzlyk Geňeşiniň hemişelik agzalary bolup durýar. Hytaý bilen ABŞ-nyň hyzmatdaşlyk edip biljek köp ugurlary bar. Mysal üçin, terrorçylyga garşy göreş we ýadro ýaraglarynyň ýaýramagynyň öňüni almak meselesi boýunça bilelikde işleşip bilerler» diýip, Fu aýtdy.
Ol şeýle hem Pekin bilen Waşingtonyň arasynda, şol sanda ikitaraplaýyn söwda we birnäçe möhüm halkara meseleleri boýunça düşünişmezlikleriň dowam edýändigini belledi.
«Elbetde, iki ýurduň arasynda düşünişmezlikleriň bardygyny inkär etmeýäris. Bu, şol sanda ikitaraplaýyn söwda meselesine we dünýäde käbir beýleki möhüm meselelerine hem degişlidir. Ýöne biz umyt edýäris, dünýä hem garaşýar — Hytaý bilen ABŞ dünýäni has gowy ýere öwürmek, BMG-niň netijeliligini we ähmiýetini ýokarlandyrmak üçin hyzmatdaşlyk edip biler» diýip, ol sözüniň üstüne goşdy.
“CCTV+” habar berşi ýaly, BMG-de Hytaýyň we ABŞ-nyň liderleriniň öňde boljak duşuşygynyň oňyn netijeler berjekdigine we iki ýurduň dünýä derejesindäki meseleler boýunça hyzmatdaşlygy üçin täze mümkinçilikleri döredjekdigine garaşylýar.
