Yza sanaw başlandy! Formula-1 2027-nji ýylda Stambula gaýdyp gelýär
Formula-1 2027-nji ýyl üçin FIA Formula One World Championship dünýä çempionatynyň senenamasyny hödürledi. Onda Türkiýäniň Gran-prisine aýratyn orun berilýär: 1–2-nji oktýabrda türgenleşikler we saýlama ýaryşlary, 3-nji oktýabrda bolsa möwsümiň esasy ýaryşy geçiriler. Uzak arakesmeden soň Stambuldaky TOSFED İstanbul Park awtodromynda ýene-de start çyralary ýakylar we bäş sany gyzyl çyra öçüp, trassadaky gyzgalaňly göreşiň başlanýandygyny habar berer.
Türkiýäniň Gran-prisiniň Formula-1 ýaryşynyň senenamasyna gaýdyp geljekdigi ilkinji gezek aprel aýynda Prezident Rejep Taýyp Ärdoganyň gatnaşan dabarasynda yglan edildi. Alty ýyldan soň Formula-1 ýaryşynyň iň ýokary tizligi dünýäniň iň güýçli sürüjilerini we müňlerçe janköýeri iki materigi birleşdirýän, dünýäniň iň täsirli megapolisleriniň biri bolan Stambulda ýene-de bir ýere jemlär. Türkiýäniň Gran-prisi onunjy gezek Stambuldaky TOSFED İstanbul Parkda — çempionatyň tehniki taýdan iň çylşyrymly trassalarynyň birinde geçiriler.
TOSFED İstanbul Park — tizlik we takyklyk üçin döredilen trassa
TOSFED İstanbul Park — 5,3 kilometr arassa adrenalin. Trassada ozup geçmek üçin köp sanly mümkinçilikli zolaklar bar, beýiklikleriň ýiti tapawutlary bolsa sürüjiniň ussatlygyny we çydamlylygyny, şeýle hem awtoulagyň mümkinçiliklerini synagdan geçirýär.
Awtodromyň täsin bölegi — meşhur sekizinji öwrüm: birnäçe depeli, ýokary tizlikde geçilýän çep öwrüm. Ol sürüjilerden kämil deňagramlylygy talap edýär we olara hem-de bolidlerine ep-esli gapdal artykmaç ýük düşürýär.
Tizligiň, tehniki çylşyrymlylygyň we öňünden çaklamak kyn bolan ritmiň utgaşmasy bu ýerdäki her bir ýaryşy hakyky tomaşa öwürýär — janköýerler bolsa onuň gönüden-göni şaýady bolarlar.
Formula-1 ýaryşynyň Türkiýä gaýdyp gelmegi bilen Stambul ýene-de dünýäniň iň abraýly sport wakalarynyň biriniň geçirilýän meýdançasyna öwrülýär. Gran-priniň geçirilmeginiň şäher we ýurt üçin möhüm itergi bermegine garaşylýar: çäre Türkiýäniň halkara sport arenasyndaky ornuny berkitmäge, sport syýahatçylygynyň ösmegine, Stambulyň köpçülikleýin habar beriş serişdelerindäki tanalmagynyň ýokarlanmagyna we ýurduň brend gymmatynyň artmagyna ýardam eder, şeýle hem megapolisiň ykdysadyýetine düýpli täsir ýetirer.
TGA-nyň «Tutup bilseň, tut» filmi dünýä tomaşaçylarynyň ünsüni çekdi
Ýaryşyň senesi tassyklanandan soň, 2027-nji ýyldaky Türkiýäniň Formula-1 Gran-prisini halkara derejesinde öňe sürmek boýunça mahabat kampaniýasynyň täze tapgyry başlandy.
Kampaniýanyň esasy bölegi Medeniýet we syýahatçylyk ministrliginiň utgaşdyrmagynda Türkiýäniň Syýahatçylygy ösdürmek we tanyşdyrmak agentligi (TGA) tarapyndan taýýarlanan «Catch It If You Can» («Tutup bilseň, tut») atly mahabat wideosy boldy. Rolik giň tomaşaçy köpçüliginiň ünsüni çekdi — onuň görülmeleriniň sany 571 milliondan geçdi.
Ýakyn wagtda Stambulyň dünýä derejesindäki tanalmagyny ep-esli ýokarlandyrmak meýilleşdirilýär. Muňa halkara media taslamalarynyň durmuşa geçirilmegi, maksatly sanly kampaniýalaryň başlanmagy, daşary ýurtly kontent döredijiler bilen hyzmatdaşlyk, şeýle hem bütinleý Stambula esasy üns berýän giň gerimli mahabat kampaniýasy ýardam eder.
Türkiýäniň Formula-1 Gran-prisiniň ýaryş senenamasyna gaýdyp gelmegi — TOSFED-iň Medeniýet we syýahatçylyk ministrliginiň, şeýle hem Ýaşlar we sport ministrliginiň goldawy bilen durmuşa geçiren köpýyllyk tagallalarynyň we yzygiderli başlangyçlarynyň netijesidir.
Gazanylan ylalaşyklara laýyklykda, TOSFED-iň guramagynda TOSFED İstanbul Park awtodromynda Formula-1 ýaryşlaryny geçirmek 2027–2031-nji ýyllar aralygy üçin meýilleşdirilýär.
ORIENT
