Koreýanyň Aziýa medeniýetiniň milli merkezinde Türkmenistanyň däp-dessurlary we sungaty
«Merkezi Aziýa – Koreýa Respublikasy» I sammitiniň çäklerinde we Türkmenistanyň Prezidentiniň döwlet saparynyň dowamynda Koreýanyň Medeniýet, sport we syýahatçylyk ministrliginiň garamagyndaky Aziýa medeniýetiniň milli merkezi (ACC — Asia Culture Center) 16-njy sentýabrda «Türkmenistanyň medeniýet gününi» geçirýär. Kwanju şäherinde geçirilýän bu giň gerimli çäre koreý halkyny Türkmenistanyň baý taryhy-medeni mirasy bilen tanyşdyrmagy we uzak möhletleýin ynsanperwer hyzmatdaşlygyň ýollaryny kemala getirmegi maksat edinýär.
Çäreleriň maksatnamasy medeniýet alyş-çalşygy we hyzmatdaşlyk ulgamynda özara düşünişmek hakyndaky Ähtnamanyň dabaraly ýagdaýda gol çekilmegi bilen başlanýar. Resminama ACC-niň maslahatlar zalynda Aziýa medeniýetiniň milli merkeziniň direktory Kim San-wuk bilen Türkmenistanyň medeniýet ministri Gurbanmyrat Myradalyýew tarapyndan gol çekilip tassyklanyldy. Baglaşylan ylalaşyk yzygiderli bilelikdäki ylmy-barlag maksatnamalaryny, sergi taslamalaryny, sungat ussatlarynyň çykyşlaryny we multimediýa mazmunyny bilelikde öndürmek boýunça işleriň hukuk binýadyny döredýär.
Maksatnamanyň esasy bölegini Türkmenistanyň däp bolan senetçilik önümlerine we milli nyşanlaryna bagyşlanan sergi düzýär. Sergide şaý-sepler, halylar we elde dokalan haly önümleri, milli egin-eşikler, başgaplar hem-de halk saz gurallary ýaly 100-den gowrak özboluşly gymmatlyk görkeziler. Serginiň ýörite bölümleri ahalteke bedewlerine, alabaý itlerine, şeýle hem ýurduň binagärlik ýadygärliklerine bagyşlanar.
Medeniýet forumynyň çäklerinde Türkmenistanyň ÝUNESKO-nyň Bütindünýä mirasynyň sanawyna girizilen ýadygärliklerine bagyşlanan ýörite sanly taslamanyň dünýä premýerasy geçiriler. Film Aziýa-Ýuwaş umman merkeziniň halkara maksatnamasynyň çäklerinde ýokary tehnologiýaly enjamlar arkaly düşürilip, taryhy we binagärlik taýdan özboluşly desgalary jikme-jik görkezýär.
Baý mazmunly maksatnamany Türkmenistanyň sungat ussatlarynyň baýramçylyk konserti jemlär. ACC-niň Medeniýet-maglumat merkeziniň sahnasynda Türkmenistanyň halk artisti Jemal Saparowa, «Dokmaçylar» folklor-etnografik ansambly, aýdymçylar we dutarda ussatlyk bilen saz çalýan ýerine ýetirijiler çykyş ederler. Olar tomaşaçylara dessanlary, däp bolan halk aýdymlaryny we estrada eserlerini hödürlärler. Guramaçylar «Türkmenistanyň medeniýet gününiň» Merkezi Aziýa ýurtlarynyň we Koreýa Respublikasynyň medeniýetleriniň arasyndaky dialogy çuňlaşdyrmak üçin möhüm meýdança öwrüljekdigini nygtaýarlar.
