Suwda ýerleşýän Olimpiýa şäherçesi: «Costa Serena» 2026-njy ýylyň Aziýa oýunlaryny kabul edýär
Serişdeleriň çäkli, maksatlaryň bolsa uly bolan häzirki zaman dünýäsinde iri çäreleriň guramaçylary adaty bolmadyk çözgütleri gözleýärler. Syýahatçylyk gämisini Olimpiýa şäherçesi hökmünde peýdalanmak diňe bir serişdeleri tygşytlamak däl, eýsem täze şertlere uýgunlaşmaga taýýarlygyň we çeýeligiň nyşanydyr.
Italiýanyň «Costa Serena» syýahatçylyk gämisi sişenbe güni Ýaponiýanyň Nagoya şäherindäki Kinzýo gämi duralgasyna geldi. Gämi Aýti we Nagoýa şäherlerinde geçiriljek 2026-njy ýylyň Aziýa oýunlarynyň dowamynda wagtlaýyn suwda ýerleşýän Olimpiýa şäherçesi hökmünde ulanylar. Aziýa oýunlarynda aýratyn Olimpiýa şäherçesi bolmaz. Bu özboluşly çözgüt boýunça türgenleriň we resmi wekilleriň bir bölegi syýahatçylyk gämisinde ýerleşdiriler. Guramaçylar täze suwda ýerleşýän ýaşaýyş merkeziniň açylyş dabarasyny geçirdiler.
“Costa Serena” gämisiniň uzynlygy 290 metr, ini 35 metr bolup, onuň 14 gatynda 1500 sany kabina ýerleşýär. Bu kabinalarda 4000-e çenli türgeni we resmi wekili ýerleşdirmek mümkin. Gämide restoranlar we türgenleşik zaly hem bar. Guramaçylar 11 müňden gowrak türgeni ýerleşdirmek üçin gämini, ýerli myhmanhanalary we ýaşaýyş üçin gaýtadan enjamlaşdyrylan konteýnerleri ulanýarlar.
Bu görkeziji Parižde geçirilen Olimpiýa oýunlaryna gatnaşanlaryň sanyndan (10 700) hem köpdür. Şeýle hem bu Aziýa oýunlarynyň taryhynda syýahatçylyk gämisiniň Olimpiýa şäherçesi hökmünde ilkinji gezek ulanylmagydyr. Bu çözgüt ýaşaýyş ýerleriniň ýetmezçiligi we býujetiň çäkliligi bilen bagly meseleleri çözmäge gönükdirilendir.
Gämide Nagoýa portunyň golaýynda geçirilýän ýaryşlara gatnaşýan wekiliýetler, şol sanda kanoe küreklemek, dzýudo we uşu boýunça türgenler ýerleşer. Olaryň arasynda Hytaýyň kanoe küreklemek boýunça ýygyndy topary hem bar. “Costa Serena” 15-nji sentýabrdan 6-njy oktýabra çenli gämi duralgasynda durar. Açylyş dabarasy şenbe güni geçirilmegi meýilleşdirilýär, 16 günlük Aziýa oýunlary bolsa 4-nji oktýabrda tamamlanar. Taýfun ýaly aşa howa şertleri ýüze çykan ýagdaýynda, gämi portdan çykyp, başga ýerde howpsuz ýerde ýerleşer.
“CCTV+”-niň habar bermegine görä, syýahatçylyk gämisiniň suwda ýerleşýän Olimpiýa şäherçesi hökmünde ulanylmagy rekord derejede köp gatnaşyjyny kabul etmäge we şol bir wagtyň özünde şäher infrastrukturasyna düşýän agramy azaltmaga mümkinçilik berýän özboluşly çözgüt boldy.
