«Ýaňlan, Diýarym!» ýaş aýdymçylaryň bäsleşiginiň ýeňijileri yglan edildi
Aşgabatda Türkmenistanyň Prezidentiniň «Türkmeniň Altyn asyry» baýragyny almak ugrundaky bäsleşigiň çäklerinde däp bolşy ýaly guralýan «Ýaňlan, Diýarym!» telebäsleşiginiň jemleýji tapgyrynyň netijeleri jemlendi.
«Aşgabat» aýdym-saz merkezinde geçirilen jemleýji tapgyrda jemi 14 finalçy çykyş etdi — her welaýatdan, şeýle hem Aşgabat we Arkadag şäherlerinden iki aýdymçy. Gatnaşyjylar halk aýdymlaryny, nusgawy kompozisiýalary hem-de häzirki zaman awtorlarynyň eserlerini ýerine ýetirdiler.
Döwlet Baştutanynyň Karary bilen telebäsleşigiň 7 ýeňijisi diplomlar we ýadygärlik altyn zynjyrlar bilen sylaglandy:
Kerem Atabaýew — Türkmenistanyň Döwlet ykdysadyýet we dolandyryş institutynyň talyby; Perhatmuhammet Esenow — Sahy Jepbarow adyndaky Arkadag şäher ýörite sungat mekdebiniň talyby; Aýlar Şöhradowa — Türkmen döwlet medeniýet institutynyň talyby; Baýrammyrat Ýakubow —Madaw obasynyň (Balkan welaýaty) medeniýet öýüniň horeografy; Röwşen Kakaýew — Akdepe etrap (Daşoguz welaýaty) medeniýet merkeziniň tansçysy; Atamyrat Muhtarow — Ýyldyz obasynyň (Lebap welaýaty) medeniýet öýüniň horeografy; Mähri Akmyradowa — Türkmenistanyň Döwlet energetika institutynyň talyby (Mary welaýaty).
