Centrum Air awiakompaniýasy Özbegistandan Hindistana yzygiderli uçuşlary ýerine ýetirip başlaýar
28-nji sentýabrdan başlap, Özbegistanyň "Centrum Air" awiakompaniýasy Özbegistan – Hindistan (Daşkent – Haýdarabad) ugry boýunça yzygiderli uçuşlary açýar. Yuz.uz neşiriniň habar bermegine görä, uçuşlar döwrebap "Airbus A320neo" uçarlar arkaly hepdede iki gezek amala aşyrylar.
Täze ugranyň tanyşdyrylyş dabarasy Özbegistanyň Ilçihanasynyň goldaw bermegi bilen Hindistanda geçirildi. Çärä iki döwletiň syýahatçylyk we işewürlik jemgyýetçiliginiň 120-den gowrak wekili gatnaşdy.
Bu uçuşyň ýola goýulmagy awgust aýynyň ahyrynda Özbegistanyň we Hindistanyň ýolbaşçylarynyň arasynda geçirilen gepleşikleriň netijeleri boýunça gazanylan ylalaşyklaryň amaly taýdan durmuşa geçirilmegi boldy. Özbegistanyň Ilçisi Sardor Rustambaýew uçuşlaryň geografiýasynyň giňeldilmeginiň ýurtlaryň arasyndaky hemmetaraplaýyn strategiki hyzmatdaşlygy berkidip biljekdigini belledi.
Tanyşdyrylyş dabarasynyň çäklerinde syýahatçylyk operatorlarynyň B2B duşuşyklary geçirildi, olarda hindi tarapy Özbegistanyň syýahatçylyk kuwwatyna uly gyzyklanma bildirdiler. Täze gatnaw işewürlik we syýahatçylar üçin logistikany ep-esli ýeňilleşdirer hem-de iki ýurduň medeni-ynsanperwer gatnaşyklaryny giňelder.
ORIENT
