Aşgabatda gümrük gözegçiligini sanlylaşdyrmak boýunça BGG-nyň halkara seminary geçirildi
Aşgabatdaky Bütindünýä gümrük guramasynyň (BGG) Sebitleýin okuw merkezinde emeli aňy ornaşdyrmak, maglumatlary birleşdirmek we töwekgelçilikleri dolandyrmak ulgamlaryny döwrebaplaşdyrmak meselelerine bagyşlanan halkara seminar geçirildi. Utgaşykly görnüşde geçirilen forum Türkmenistanyň Döwlet gümrük gullugynyň ýolbaşçylaryny we hünärmenlerini, BGG-niň Ýewropadaky okuw merkezleriniň wekillerini, şeýle hem Azerbaýjandan we BGG-niň Sekretariatyndan gelen bilermenleri bir ýere jemledi.
Ara alyp maslahatlaşmalaryň esasy temasy «Akylly gümrük» (Smart Customs) atly ählumumy başlangyjy boldy. BGG-niň Sekretariatynyň bilermenleri Dimitris Politopulos we doktor Tong Hua serhet amallaryny awtomatlaşdyrmagyň halkara standartlaryny hödürlediler. Seminaryň esasy çykyşçysy — Azerbaýjanyň Döwlet gümrük komitetiniň wekili Ýusif Usubow — töwekgelçilikleriň awtomatiki profilleşdirilmegi we deklarasiýalaryň seljerilmegi üçin maşynlaýyn öwreniş algoritmlerini hem-de neýroulgamlary ulanmak boýunça amaly tejribesini paýlaşdy.
Türkmenistanyň gümrük gullugynyň işgärleri gulluklary sanlylaşdyrmak we gözden geçiriş hem-de seljeriş işlerine emeli aň çözgütlerini ornaşdyrmak boýunça milli tejribelerini hödürlediler. Gatnaşyjylar Türkmenistanyň Döwlet gümrük gullugynyň Gözegçilik we seljeriş merkezine hem baryp, ýük akymlaryna hakyky wagt tertibinde gözegçilik edýän sanly toplumlaryň işi bilen tanyşdylar.
Duşuşygyň netijeleri boýunça taraplar işgärleriň hünär mümkinçiliklerini ýokarlandyrmak we BGG-niň Ýewropa sebitiň çäklerinde bilelikdäki tehnologik taslamalary durmuşa geçirmek boýunça ädimleri kesgitlediler.
