Türkmenistan bilen Gazagystan kärdeşler arkalaşyklarynyň hyzmatdaşlygyny pugtalandyrýar: Astanadaky duşuşygyň netijeleri
11-nji sentýabrda Astanada Türkmenistanyň we Gazagystanyň kärdeşler arkalaşyklarynyň ýolbaşçylarynyň gepleşikleri geçirildi. Türkmenistanyň Kärdeşler arkalaşyklarynyň Milli merkeziniň başlygy Oguljennet Berdiliýewa bilen Gazagystan Respublikasynyň Kärdeşler arkalaşyklarynyň Federasiýasynyň başlygy Satybaldy Dauletin zähmetkeşleriň hukuklaryny goramak, zähmeti goramak, durmuş hyzmatdaşlygy we tejribe alyşmak bilen bagly esasy meseleleri ara alyp maslahatlaşdylar.
Duşuşygyň esasy netijesi özara düşünişmek we hyzmatdaşlyk hakynda Ähtnama gol çekilmegi boldy. Resminama iki ýurduň degişli guramalarynyň arasynda hünär gatnaşyklaryny giňeltmäge we bilelikdäki durmuş başlangyçlaryny durmuşa geçirmäge gönükdirilendir.
Saparyň çäklerinde Halkara Zähmet Guramasynyň (HZG) wekilleriniň gatnaşmagynda halkara tegelek stoly hem geçirildi. Bilermenler durmuş dialogyny pugtalandyrmak we mynasyp zähmet ýörelgelerini ornaşdyrmak meselelerini ara alyp maslahatlaşdylar.
Taraplar sebit derejesindäki iri çäreleriň geçirilmegine taýýarlyk meselesine hem aýratyn üns berdiler. 2026-njy ýylyň noýabr aýynda Aşgabatda Merkezi Aziýa ýurtlarynyň we Azerbaýjanyň kärdeşler arkalaşyklarynyň başlyklarynyň Halkara forumy, şeýle hem durnukly ösüşe we zähmet standartlarynyň berjaý edilmegine bagyşlanan halkara maslahat geçiriler.
Duşuşyk Türkmenistan bilen Gazagystanyň arasyndaky däp bolan dostlukly gatnaşyklary ýene-de bir gezek tassyklady hem-de uzak möhletleýin amaly hyzmatdaşlyk üçin binýat döretdi.
ORIENT
