Türkmenistanyň ýokary okuw mekdeplerinde emeli aň we «akylly» şäherler boýunça halkara maslahatlar geçiriler
2026-njy ýylyň oktýabr aýynda Türkmenistanyň ýokary okuw mekdepleri daşary ýurtly alymlaryň we degişli halkara guramalaryň bilermenleriniň gatnaşmagynda sanly görnüşde halkara ylmy-amaly maslahatlaryň tapgyryny geçirer.
Wise-premýer B. Mämmеdow anna güni geçirilen Ministrler Kabinetiniň mejlisinde beren hasabatynda forumlaryň geçiriljek meýdançalarynyň şu aşakdakylardygyny habar berdi:
• Türkmen döwlet binagärlik-gurluşyk instituty «Gurluşyk we senagat toplumynda innowasion tehnologiýalaryň orny» atly maslahaty geçirer. Maslahatda «akylly» we «ýaşyl» şäherleriň konsepsiýasy, awtomatizasiýa hem-de robototehnika meselelerine garalar;
• Türkmenistanyň Oguz han adyndaky Inžener-tehnologiýalar uniwersitetinde «Milli emeli aň tehnologiýalary: sanly ykdysadyýet, «akylly» diwersifikasiýa, durnukly ösüş» atly maslahat geçiriler.
