Özbegistanda ilkinji gezek Merkezi Aziýanyň Halkara talyp sportunyň forumy geçiriler
29-njy sentýabr - 2-nji oktýabr aralygynda Özbegistanda Merkezi Aziýanyň I Halkara talyp sportunyň forumy geçiriler. Yuz.uz neşiriniň habar bermegine görä, giň gerimli çäre Halkara Uniwersitet sport federasiýasynyň (FISU) prezidenti Leons Ederiň saparyna bagyşlanandyr.
Forumyň esasy maksady sebitde talyplar sportuny ösdürmek üçin bitewi platformany döretmekden ybaratdyr. Çärä FISU-nyň ýolbaşçylary, şeýle hem Gazagystandan, Gyrgyzystandan, Mongoliýadan, Täjigistandan we Türkmenistandan wekiliýetler gatnaşarlar. Sport federasiýalarynyň we halkara guramalaryň wekilleri mundan beýläk-de hyzmatdaşlygyň geljegini hem-de tejribe alyşmagy ara alyp maslahatlaşarlar.
Saparyň dowamynda FISU-nyň ýolbaşçysy uniwersitet sportuny ösdürmegiň özbek nusgasyny, onuň guramaçylyk mehanizmlerini we gazanylan netijelerini öwrener. Mundan başga-da, Leons Eder «Bäş başlangyç» talyplar olimpiadasynyň çägindäki ýaryşlaryň açylyş dabarasyna gatnaşar.
Forumyň geçirilmegi Merkezi Aziýa ýurtlarynyň halkara talyp sport hereketindäki barha artýan ornuny görkezip, sebitdäki ýaş türgenler üçin täze mümkinçilikleri açýar.
ORIENT
