Türkmen ekerançylary güýzlük bugdaý ekişine girişdiler
Türkmenistanda oba hojalyk möwsüminiň esasy tapgyry başlandy — 2-nji sentýabrda ýurduň ähli welaýatlarynda bir wagtda köpçülikleýin güýzlük bugdaý ekişine girişildi. Ähli sebitlerde ekiş möwsüminiň bir wagtda başlamagy gallaçylara amatly şertlerden has netijeli peýdalanmaga we geljekki hasylyň binýadyny goýmaga mümkinçilik berýär.
Asylly däbe görä, ekiş möwsümine sebitleriň ýaşululary ekişe badalga berip, nobatyny mehanizatorlara geçirdiler. Ýurdun obasenagat toplumynyň tehniki binýady möwsüme doly taýýarlyk bilen geldi: meýdanlara topragy işläp taýýarlaýan we ekiji tehnikalaryň doly toplumy çykaryldy. Bu bolsa agrotehniki möhletleriň, tohumlary talaba laýyk ekilmegini we toprakdaky çyglylygyň saklanmagyny üpjün edýär.
Işleriň başlamagy bilen bir hatarda, ähli welaýatlarda agronomlar, mehanizatorlar we kärendeçiler üçin amaly okuw-seminarlar geçirildi. Esasy üns häzirki zaman agrotehniki usullaryny ornaşdyrmaga, suw serişdelerinden rejeli peýdalanmaga we däneli ekinleri ösdürip ýetişdirmegiň tehnologiki döwrebap usullary berjaý etmäge gönükdirildi.
Ekiş möwsüminiň başlanmagy däp bolşy ýaly, ýurdumyzyň obasenagat toplumynyň gazananlarynyň sergisi bilen utgaşdyrylýar. Sergide diňe bir tehniki serişdeler we ýokary hasylly bugdaý sortlary däl, eýsem, ýurduň azyk garaşsyzlygynyň doly önümçilik tapgyryny görkezýän gaýtadan işleýän senagatyň taýýar önümleri hem görkezilýär.
