Sietl şäheriniň häkimi 1-nji sentýabry Özbegistanyň Garaşsyzlyk güni diýip yglan etdi
ABŞ-nyň Sietl şäheriniň häkimi Keti B. Uilson ýörite proklamasiýa gol çekdi. Oňa laýyklykda, 2026-njy ýylyň 1-nji sentýabry resmi taýdan «Özbegistanyň Garaşsyzlyk güni» diýlip yglan edildi. Bu barada Yuz.uz habar berýär.
Resminamada Özbegistan Respublikasynyň garaşsyzlygynyň 35 ýyllygynyň taryhy ähmiýeti nygtalýar. Şeýle hem ýurduň özygtyýarlylygyny berkitmek we giň gerimli ykdysady özgertmeleri durmuşa geçirmek ugrunda gazanan üstünlikleri bellenilýär.
Proklamasiýada Özbegistan Merkezi Aziýanyň esasy ykdysady we medeni merkezleriniň biri hökmünde häsiýetlendirilýär. Ýurtda ykdysadyýetiň ýyllyk 5–6 göterim derejesinde ösýändigi, açyk bazar ýörelgesine eýerýändigi we gadymy Ýüpek ýolunyň merkezinde ýerleşýän amatly geografik ýagdaýy aýratyn bellenilýär. Häzirki wagtda sebit 100 milliondan gowrak sarp edijini öz içine alýan strategik bazar bolup, bu ýagdaý Sietliň işewürleri üçin söwda, tehnologiýalar, logistika we energetika ulgamlarynda uly mümkinçilikleri açýar.
Baýramçylygyň şäher häkimiýetleri tarapyndan resmi taýdan ykrar edilmegi Özbegistanyň Sietldäki Baş konsullygynyň alyp barýan işleri bilen hem baglanyşdyrylýar. Baş konsullyk taraplaryň arasynda işewürlik, medeni we ynsanperwer gatnaşyklary ösdürmäge hem-de berkitmäge ýardam berýär.
ORIENT
