Bişkekde VI Bütindünýä çarwadarlaryň oýunlary badalga alýar
Gyrgyzystanda 31 awgustda VI Bütindünýä çarwadarlaryň oýunlary — dünýäniň onlarça ýurdunyň wekillerini birleşdirýän ýylyň esasy etnosport we medeni forumy başlanýar. Bu waka diňe bir däp bolan sport görnüşleri boýunça ýaryş däl: şu gün ol bütin Merkezi Aziýanyň brendinginiň, medeni diplomatiýany ösdürmegiň we sebitde etnosyýahatçylygy kemala getirmegiň kuwwatly guralydyr.
Türkmenistan Gündogar halklarynyň özboluşly mirasyny gorap saklamaga we ony wagyz etmäge saldamly goşant goşup, Oýunlara gatnaşýar. Türkmen türgenleriniň gatnaşmagynyň esasy tarapy ýaryşlaryň maksatnamasyna resmi taýdan girizilen milli göreş bolar.
Bütindünýä çarwadarlaryň oýunlary ýokary derejeli sportuň etnomedeni maksatnama — senetçilik, folklor we özboluşly durmuş däpleri bilen utgaşýan häzirki zaman «ýumşak güýç» platformasy hökmünde çykyş edýär. Türkmenistan üçin bu diňe bir däp bolan görnüşler boýunça medallar ugrunda göreşmek däl, eýsem adamzadyň maddy däl mirasyny gorap saklamakda global ýörelgeleri kesgitlemäge ukyply bolan ýeke-täk medeni-siwilizasiýa giňişligi hökmünde sebitiň abraýyny berkitmek üçin hem mümkinçilikdir.
Oýunlaryň çäginde çarwa siwilizasiýalaryny öwrenmegiň dürli ugurlaryna — olaryň dünýä taryhyndaky ornundan başlap, durnukly ösüşiň, sanlylaşdyrmagyň we medeni mirasy gorap saklamagyň häzirki zaman meselelerine çenli bagyşlanan «Çarwa siwilizasiýalary: miras, paradigmalar we geljekki ugurlar» atly Halkara ylmy maslahat geçiriler.
Çarwa siwilizasiýasy merkezinde «Beýik daglaryň rowaýaty» sergisi, daş we gum heýkelleriň aleýallary, gezelençler, şekillendiriş sungaty, grafika, heýkeltaraşlyk we keramika boýunça ussatlyk sapaklary, gadymy gyrgyzlaryň ýaraglarynyň sergisi, şeýle hem «Han-Tengriniň syry» atly ot tomaşasy gurnaldy.
