Pakistanyň Maglumat tehnologiýalary ministrligi Türkmenistan bilen bilelikdäki taslamalaryň mümkinçiliklerini öwrenýär
Türkmenistan bilen Pakistan sanly özgertmeler we telekommunikasiýalar ulgamyndaky gatnaşyklary işjeňleşdirýär. Bilelikdäki hyzmatdaşlygyň möhüm ugurlary Yslamabat şäherinde Pakistan Respublikasynyň Maglumat tehnologiýalary we telekommunikasiýalar ministrliginiň Halkara utgaşdyryş departamentiniň wekili Muhammet Amir Malikiniň ýolbaşçylygyndaky wekiliýeti bilen Türkmenistanyň diplomatik wekilhanasynyň ýolbaşçylygynyň arasynda geçirilen duşuşykda ara alnyp maslahatlaşyldy.
Gepleşikleriň esasy temasy iki ýurduň maglumat tehnologiýalary ulgamyndaky hyzmatdaşlygyny amaly mazmun bilen baýlaşdyrmakdan ybarat boldy. Pakistan tarapy Türkmenistanyň ykdysadyýeti, döwlet dolandyryş ulgamyny we durmuş ulgamyny giň gerimde sanlylaşdyrmak boýunça strategiýasy bilen jikme-jik tanyşdyryldy. Taraplar maglumat tehnologiýalary infrastrukturasyny, telekommunikasiýalary we elektron hökümeti ösdürmek boýunça tejribe alyşmak, şeýle hem bilelikdäki tehnologik başlangyçlary durmuşa geçirmek üçin uly mümkinçilikleriň bardygyny bellediler.
Duşuşygyň dowamynda pakistanly hünärmenlere Türkmenistanyň Garaşsyzlygynyň 35 ýyllygy mynasybetli geçiriljek möhüm halkara taslamalary we jemgyýetçilik-syýasy çäreleri barada hem maglumat berildi. Hususan-da, sentýabr aýynda geçiriljek Halk Maslahatynyň mejlisiniň jemgyýetçilik-syýasy ähmiýetine, şeýle hem 4–6-njy sentýabr aralygynda Niderlandlar Patyşalygynda geçiriljek ahalteke bedewleri boýunça taryhda ilkinji dünýä çempionatyna aýratyn üns berildi.
Gepleşikleriň jemleri boýunça Pakistanyň Maglumat tehnologiýalary ministrliginiň wekili bilen Türkmenistanyň ilçisi iki döwletiň başlangyçlaryny halkara meýdançalarynda özara goldamaga we uzak möhletleýin tehnologik hyzmatdaşlygy ösdürmäge taýýardyklaryny tassykladylar.
