Guançžoudaky Nanşa portundan Ýewropa täze Arktika konteýner ugry ýola goýuldy
Guandun-Gonkong-Makao Uly aýlag sebitinde Ýewropa tarap täze çaltlaşdyrylan söwda ugry peýda boldy: penşenbe güni irden Guançžoudaky Nanşa portundan Arktika arkaly her hepde-de amala aşyrylýan täze konteýner gatnawy ýola çykdy.
Ozal geçip bolmajak buzly çöl hökmünde görülýän Arktika häzirki wagtda dünýä söwdasynyň täze şahasyna öwrülýär. Buzlaryň eremegi we tehnologiýalaryň ösmegi Gündogar bilen Günbataryň arasyndaky iň gysga ýoly açyp, gatnaw wagtyny iki hepde töweregi gysgaldýar. Bu ugur diňe bir logistiki täzelik däl, eýsem üýtgeşmeleriň nyşanydyr: howanyň üýtgemegi dünýäniň kartasyny üýtgedýär, adamzat bolsa bu üýtgeşmelerden ykdysadyýetiň bähbidi üçin peýdalanmagy öwrenýär.
Şeýle-de bolsa, buzly umman henizem öňünden çaklamak kyn bolan şertleri döredýär we täze ýoluň üstünlikli işlemegi nawigatorlaryň ussatlygyna hem-de çaklamalaryň takyklygyna bagly bolup galýar. «Riad Mukab» atly gämi çarşenbe güni günortan Nanşa portuna geldi we ýükleri bir gijäniň dowamynda düşürenden we ýükländen soň, penşenbe güni irden ýola çykdy.
Ýerli immigrasiýa gulluklary gämi üçin «ýaşyl geçelge» açyp, gümrük resmileşdirmelerini ýeňilleşdirdi we onuň öz wagtynda ýola çykmagyny üpjün etdi. Russiýanyň Demirgazyk deňiz ýoly boýunça geçýän täze ugur Guançžoudan Beýik Britaniýanyň Felikstou portuna çenli gatnaw wagtyny takmynan 28 güne çenli gysgaldýar. Bu Afrikanyň günorta çüňküniň — Gowy Umyt burnunyň üsti bilen geçýän adaty ugur bilen deňeşdirilende 14 gün azdyr.
Bu uguryň täjirçilik taýdan özüne çekijiligi üstaşyr geçiş wagtynyň gysgaldylmagy we eksport edijiler üçin ätiýaçlyk serişdeleri hem-de harytlary wagtynda eltip bermek bilen bagly töwekgelçilikleriň peselmeginden ybarat. Emma bu ugur möwsümleýin buz örtügi bilen çäklendirilýär.
Esasy nawigasiýa döwri, adatça, iýul aýyndan oktýabr aýyna çenli dowam edýär. Operatorlar şu möwsümde bu ugurda buz şertlerinde ýüzmäge ukyply sekiz gämä çenli peýdalanmagy meýilleşdirýärler. Kompaniýanyň maglumatlaryna görä, gämiler buzuň ýagdaýyna hakyky wagt tertibinde gözegçilik etmek ulgamyndan peýdalanar we howa hem-de buz şertleriniň üýtgemegine görä ugurlaryny düzerler.
Demirgazyk deňiz ýoly Russiýanyň demirgazyk kenarynyň ugrunda ýerleşýän we Atlantik hem-de Ýuwaş ummanlaryny birleşdirýän gämi gatnaw ýoludyr. Soňky ýyllarda howanyň maýlamagy we buz örtüginiň azalmagy sebäpli bu ugra bolan gyzyklanma düýpli ýokarlandy.
Hytaý «Bir guşak — bir ýol» başlangyjynyň çäklerinde «Polýar Ýüpek ýolunyň» ösdürilmegine işjeň gatnaşýar. Nanşadan täze yzygiderli gatnawyň ýola goýulmagy bu ugurdaky möhüm ädim bolup, Hytaýyň günortasyndan Ýewropa ugradylýan ýükleriň Sues kanaly ýa-da Afrikanyň daşyndan geçýän ugurlar bilen deňeşdirilende has tiz ýetirilmegine mümkinçilik berýär. Şeýle-de bolsa, nawigasiýa üçin gysga wagt aralygy we buz döwýän gämileriň ugradylmagynyň zerurlygy häzirlikçe bu uguryň gerimini çäklendirýär.
“CCTV+”-niň habar berşi ýaly, Nanşa portundan Arktika konteýner ugrunyň ýola goýulmagy Hytaý bilen Ýewropanyň arasyndaky söwdada täze sahypany açýar. Gatnaw wagtynyň iki hepde gysgaldylmagy eksport edijilere düýpli artykmaçlyk berýär, logistika kompaniýalary üçin bolsa ugurlary diwersifikasiýa etmäge mümkinçilik döredýär. Ýakyn ýyllarda buz döwüji flotyň ösdürilmegi we howa şertlerini çaklamagyň kämilleşdirilmegi bilen bu ýol, esasan hem tomus aýlarynda, adaty günorta ugurlaryna çynlakaý bäsdeş bolup biler.
