Türkmenistanly ýaş artistiň tansy Moskwada geçirilen Halkara çagalar medeni forumyny bezedi
20-nji awgustda Moskwada V Halkara çagalar medeni forumynyň merkezi çäresine öwrülen «Dostluk» gala-konserti geçirildi. Konsertde Maýa Kulyýewa adyndaky Türkmen milli konserwatoriýasynyň ýanyndaky ýörite sazçylyk mekdep-internatynyň okuwçysy Aýşat Rejepowa çykyş etdi.
Forum her ýyl geçirilýär we döredijilik taýdan zehinli çagalaryň özara pikir alyşmagy, öňdebaryjy mugallymlar, ýerine ýetirijiler we jemgyýetçilik işgärleri bilen duşuşmagy üçin özboluşly meýdança bolup durýar. Bu ýerde gatnaşyjylar öz zehinlerini görkezýärler, tejribe alyşýarlar we medeniýeti ösdürmek boýunça pikirlerini paýlaşýarlar. Şu ýylky çärä Russiýadan we daşary ýurtlardan çagalar gatnaşýar.
Türkmenistanly ýaş artist konsertiň gatnaşyjylarynda aýratyn täsir galdyryp, görnükli türkmen kompozitory Nury Halmämedowyň sazyna «Meniň dutarym» atly tansyny ussatlyk bilen ýerine ýetirdi.
Öz halkynyň baý medeniýetini çuňňur özleşdiren kompozitor milli däp-dessurlara sazlaşýan eserleri döretdi. Nury Halmämedowyň eserleri türkmen halkynyň özboluşly medeni mirasynyň bir bölegi bolup, Watanymyzyň çäklerinden uzaklarda-da ýaňlanmagyny dowam etdirýär.
Türkmen tansy gadymy sungat bolup, ol ynsanyň barlygyň syrlaryna we daş-töwerekdäki dünýä bilen sazlaşyga düşünmäge bolan baky ymtylyşyndan döräpdir. Milli öwüşgini, halk saz gurallarynyň gaýtalanmajak owazy we häzirki zaman äheňleri utgaşan tans tomaşaçylar tarapyndan uly ruhubelentlik bilen garşylandy.
ORIENT
