Burgas «Ýewrowideniýe-2027» aýdym-saz bäsleşigini kabul eder
Bolgariýanyň Burgas şäheri 71-nji «Ýewrowideniýe» aýdym-saz bäsleşiginiň geçiriljek ýeri hökmünde saýlandy. Ýewropa ýaýlym birleşigi (EBU) bilen Bolgariýanyň milli telewideniýesi (BNT) bu baradaky karary 13-nji awgustda yglan etdi. Bäsleşik 2027-nji ýylyň maý aýynda geçiriler.
Burgas Bolgariýanyň iň uly halkara aýdym-saz teleşousyny kabul etjek ilkinji şäheri bolar. Guramaçylaryň bu şäheri saýlamagy Bolgariýanyň «Ýewrowideniýede» taryhynda ilkinji ýeňşinden soň amala aşdy. Aýdymçy DARA 2026-njy ýylda Wenada geçirilen bäsleşikde «Bangaranga» aýdymy bilen ýeňiş gazandy.
Näme üçin Burgas?
Bäsleşigi kabul etmek hukugy üçin Bolgariýanyň dört şäheri dalaşgärlik etdi. Olaryň arasynda paýtagt Sofiýa hem bardy. Emma EBU infrastrukturasyny, myhmanhana mümkinçiliklerini, ulag taýdan amatly ýerleşişini, şeýle hem iri medeni we halkara çäreleri geçirmekde toplan tejribesini göz öňünde tutup, Burgas şäherini saýlady.
Guramaçylar şäheriň Gara deňziniň kenarynda ýerleşmegini, ösen syýahatçylyk infrastrukturasyny we baý medeni durmuşyny hem aýratyn artykmaçlyk hökmünde bellediler. EBU-nyň baha bermegine görä, Burgas bäsleşigiň derejesine laýyk gelýän meýdançany gatnaşyjylara we tomaşaçylara hödürläp biler.
Bäsleşik “Arena Burgasda” geçiriler
Bäsleşigiň esasy meýdançasy “Arena Burgas” bolar. Bu 2023-nji ýylda açylan häzirki zaman sport we güýmenje toplumydyr.
Iki ýarym final 2027-nji ýylyň 11-nji we 13-nji maýynda, final bolsa 15-nji maýda geçiriler. Telewizion gepleşiklerden başga-da, şäherde “Eurovision Week” atly çäreler hepdeligi guralar. Onuň çäginde “Eurovision Village” we “EuroClub” ýaly çäreler hem geçiriler.
Bolgariýadaky ilkinji bäsleşik
«Ýewrowideniýe-2027» bäsleşiginiň Bolgariýada geçirilmegi ýurt üçin taryhy waka bolar. DARA-nyň Wenada gazanan ýeňşinden soň, Bolgariýa ilkinji gezek bu bäsleşigi kabul etmek hukugyna eýe boldy.
«Ýewrowideniýe» bäsleşiginiň direktory Martin Grin guramaçylaryň Burgasda Bolgariýanyň milli aýratynlyklaryny görkezýän we şol bir wagtyň özünde «Ýewrowideniýäniň» hemmä mälim bolan özboluşly atmosferasyny saklaýan bäsleşigi geçirmek isleýändiklerini aýtdy. Şäher dünýäniň dürli künjeklerinden gelen aýdymçylary, milli wekiliýetleri, žurnalistleri we bäsleşigiň muşdaklaryny kabul eder.
