KIDS EXPO 2026 sergisinde küşt boýunça dünýäniň çempionlary Türkmenistanyň ýygyndy toparlary üçin ussatlyk sapaklaryny geçirer
19–22-nji awgust aralygynda Aşgabatda «KIDS EXPO: ähli zat çagalar üçin» atly Halkara sergi-ýarmarkasy geçiriler. Serginiň sport maksatnamasynyň esasy wakalarynyň biri meşhur halkara myhmanlaryň gatnaşmagynda giň gerimli küşt festiwaly bolar.
Türkmenistana çagyrylan myhmanlarynyň hatarynda iki grossmeýster we ýetginjekleriň arasynda dünýä çempiony — Gazagystanyň Küşt federasiýasynyň birinji wise-prezidenti, Aziýa küşt federasiýasynyň wise-prezidenti Darmen Sadwakasow, şeýle hem Türki Küşt assosiasiýasynyň we Azerbaýjanyň Küşt federasiýasynyň baş sekretary, zenan grossmeýster Ilaha Kadymowa bar. Tanymal küştçiler Türkmenistanyň zenanlar we ýaşlar ýygyndy toparlary üçin okuw-usulyýet ussatlyk sapaklaryny geçirerler.
Festiwalyň esasy ýaryşy 19–20-nji awgustda geçiriljek rapid we blis görnüşleri boýunça halkara Kids Expo Chess Cup 2026 ýaryşy bolar.
Sergä gelýänleriň ählisi üçin «Küşt adajygy» meýdançasynda interaktiw zolaklar guralar:
• bary-ýogy 30 minutda küşt oýnamagy öwrenmek boýunça çalt okuw;
• tejribeli ussatlaryň tagta seredilmän geçirilýän birbada birnäçe garşydaş bilen oýun görkezmesi;
• baýrakly bäsleşikler, hünärmen küştçüler bilen oýunlar we tematik fotosurat zolagy.
Işewürlik maksatnamasynyň çäklerinde 19-njy awgustda 11 ýurduň küşt federasiýalarynyň wekilleriniň gatnaşmagynda halkara tegelek stoly geçiriler. Onda ýolbaşçylar we bilermenler sebitde küşt sportyny mekdep maksatnamalaryna ornaşdyrmagyň üstünlikli tejribesini we geljekki mümkinçiliklerini ara alyp maslahatlaşarlar.
Ýaryşyň guramaçylary we hyzmatdaşlary Türkmenistanyň Söwda-senagat edarasy, Türkmenistanyň Küşt federasiýasy, Halkara mekdep küşt federasiýasy (HMKF), Türki Küşt assosiasiýasy (TKA), Gazagystanyň Küşt federasiýasynyň Freedom Asian Chess Initiatives (FACI) maksatnamasy, Freedom kompaniýalar topary hem-de TurkmenExpo kompaniýasydyr.
KIDS EXPO 2026 sergisiniň çäklerindäki küşt festiwaly Türkmenistanyň çagalarynyň we ýaşlarynyň arasynda küşt sportunyň meşhurlygyny artdyrmakda möhüm ädim bolar hem-de halkara sport we bilim hyzmatdaşlygyny giňeltmäge ýardam eder.
ORIENT
