Galyndydan ekologik tehnologiýa çenli: saçlar nebit önümlerini süzmek üçin serişde hökmünde ulanylýar
Braziliýada ekologik taslama durmuşa geçirilýär. Onuň çäklerinde kesilen adam saçlary kenarýaka suwlarynda nebit önümlerini we beýleki hapalaýjy maddalary saklamak üçin ýörite päsgelçiliklere öwrülýär.
Taslamany Mariana Robran tarapyndan esaslandyrylan täjirçilik däl “Fiotrar” guramasy durmuşa geçirýär. Hapalaýjy maddalary süzmek üçin saçlardan peýdalanmak tehnologiýasy Çili we ABŞ ýaly ýurtlarda hem ulanylýar.
Braziliýadaky ilkinji synaglar Rio-de-Žaneýro ştatynyň Guanabara aýlagyndaky Bom-Žezus diýen ýerinde geçirildi. Bu ýerde eýýäm zibilleri saklamak üçin niýetlenen ýüzýän päsgelçilik gurnalan.
Täze süzgüçler “Fiotrar” päsgelçiliginiň esasy hökmünde ulanylýan mämişi reňkli ýüzýän päsgelçilige berkidilýär.
Saçlar nebit önümlerini saklaýar
Gurluş silindr görnüşinde bolup, onuň içi saçlardan doldurylýar. Suwda ýerleşdirilen bu süzgüçler nebit, biodizel we beýleki hapalaýjy maddalary saklap bilýän päsgelçiligi emele getirýär.
Himik Karoline Karwalýunyň aýtmagyna görä, şeýle päsgelçilikler deňizde dört aýa çenli saklanyp bilýär. Olar gämilerden, bikanun zyňyndylardan we beýleki çeşmelerden gelýän hapalaýjy maddalary saklamak üçin niýetlenendir.
Dellekhanalar çig malyň çeşmesine öwrülýär
Taslamanyň mümkinçilikleri, beýleki zatlar bilen bir hatarda, esasy çig malyň elýeterliligi bilen baglanyşykly. Häzirki wagtda takmynan on sany gözellik salony parik taýýarlamak üçin ulanylmaýan kesilen saçlary ekologik süzgüçler öndürmek üçin tabşyrýar.
Nebiti süzmek we siňdirmek üçin haýwan ýüňünden hem peýdalanmak mümkin.
Şeýlelikde, adatça galyndy hökmünde taşlanýan serişde tebigaty goramak tehnologiýasynda amaly ulanyşa eýe bolýar.
Hapalanma balykçylyga howp salýar
Guanabara aýlagy onlarça ýyllaryň dowamynda dürli görnüşli hapalanma bilen ýüzbe-ýüz bolup gelýär. Muňa täsir edýän faktorlaryň biri güýçli gämi gatnawy we gämileriň hemişelik hereketidir.
Ýerli balykçylar dökülen nebitiň balykçylyk işine edýän täsirini belleýärler. Balykçy Seržio Karwalýu deňze çykanda balyk torlarynyň köplenç nebit bilen hapalanan ýerlere gabat gelýändigini gürrüň berdi.
Onuň sözlerine görä, nebit suwuň üstünde galýar, emma janly bedene takmynan bir ýarym metr çuňluga çenli täsir edýär. Bu bolsa balyklaryň sanyna öz täsirini ýetirýär.
Köp ýyllyk taryhy bolan ekologik başlangyç
“Fiotrar” guramasynyň esaslandyryjysy Mariana Robran köp ýyllardan bäri saçlardan peýdalanmak bilen baglanyşykly taslamalar bilen meşgullanýar. 2013-nji ýylda ol haýyr-sahawat maksatly “Cabelegria” taslamasyny işe girizdi. Taslamanyň maksady onkologik näsaglar üçin saçlardan parik taýýarlamakdan ybaratdy.
Häzirki wagtda şol bir çeşme ekologik ugurda täze görnüşde ulanylýar.
Taslamanyň gatnaşyjylary we balykçylyk jemgyýetiniň wekilleri saçlardan taýýarlanan päsgelçilikleriň Guanabara aýlagyndaky hapalanma derejesini azaltmaga we onuň ekoulgamynyň dikeldilmegine ýardam berjekdigine umyt bildirýärler.
