Arkadag şäherinde gurulýan medrese ýokary okuw mekdebiniň derejesine eýe bolar
Arkadag şäherinde täze «Arkadagyň ruhy metjidiniň» ýanynda gurulýan medrese ýokary okuw mekdebiniň derejesine eýe bolar. Bu baradaky teklip din wekili Ý. Hojagulyýew tarapyndan täze şäherde geçirilen iş maslahatynda öňe sürüldi diýip, TDH habar berýär.
Onuň aýtmagyna görä, medresäniň gurluşygynyň gerimi we derejesi ýokary okuw mekdeplerine bildirilýän talaplara kybap gelýär. Täze derejäniň berilmegi yslam dünýäsinde umumy kabul edilen bilim ölçeglerine laýyklykda okuwlary guramaga mümkinçilik berer hem-de ýaş nesle däp bolan ruhy gymmatlyklary ýetirmäge ýardam eder.
Bu teklip türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow tarapyndan makullanyldy. Milli Liderimiz dünýäniň dürli ýurtlarynda şeýle ýokary okuw mekdepleriň hereket edýändigini belledi.
Şunuň bilen baglylykda, gurulýan okuw mekdebiniň maddy-enjamlaýyn binýadyny mundan beýläk-de berkitmek, şeýle hem okuw işini guramakda we öwrediljek sapaklary özleşdirmekde halkara tejribesinden ugur almak boýunça degişli maslahatlar berildi.
Şeýle hem Türkmenistanyň müftüsiniň müdiriýetiniň agzalary bilen maslahatlaşmagyň we olar bilen sazlaşykly tagalla edilmeginiň möhümdigi nygtaldy. Taýýarlyk ugurlaryny kesgitlemäge we halkara ölçegleri nazara almak bilen degişli okuw maksatnamalaryny işläp taýýarlamaga aýratyn üns bermek teklip edildi.
