Magtymguly Pyragy baradaky türkmen-özbek filmi Sankt-Peterburg şäherinde geçiriljek LEFF kino festiwalynda görkeziler
Türkmenistanyň we Özbegistanyň kinematografçylarynyň bilelikde döreden «Magtymguly Pyragy» atly çeper filmi 20–22-nji awgust aralygynda Sankt-Peterburg şäherinde geçiriljek “Lendoc Film Festival” (LEFF) atly VII halkara kino festiwalyň resmi maksatnamasyna girizildi. XVIII asyryň nusgawy şahyry we akyldary Magtymguly Pyragynyň doglan gününiň 300 ýyllygyna bagyşlanyp surata düşürilen bu taryhy biografik film Ýewraziýa giňişliginiň esasy kino forumlarynyň birinde sebitiň medeni mirasyny tanyşdyrar.
«Oguzhan» adyndaky «Türkmenfilm» birleşigi bilen Özbegistanyň Kinematografiýa agentliginiň režissýor Muzaffarhon Erkinowyň ýolbaşçylygynda durmuşa geçiren taslamasy şahyryň şahsyýetiniň kemala gelşi, onuň Buhara we Hywa medreselerinde bilim alşy, şeýle hem halklaryň agzybirligine we jebisligine bolan üznüksiz ymtylyşy barada gürrüň berýär. Filmde baş keşbi ýaş türkmen aktýory Ahmet Amandurdyýew ýerine ýetirdi.
«Magtymguly Pyragy» atly filmi eýýäm halkara kino giňişliginde bilermenleriň we tomaşaçylaryň ýokary bahasyna mynasyp boldy. Film Aşgabatda geçirilen «Gorkut Ata» atly IV halkara kino festiwalynda «Iň gowy çeper film» ugrundan baş baýraga, Türkiýede geçirilen «Turan» kino festiwalynda birinji baýraga eýe boldy. Şeýle hem Londondaky “ECG Film Festival” atly kino festiwalynda tomaşaçylaryň söýgüsine mynasyp bolan film hökmünde ýörite baýrak bilen sylaglandy. Mundan başga-da, film Almatydaky «Ýewraziýa» we Kazandaky «Altyn Minbar» festiwallarynyň bäsleşik maksatnamalaryna girizildi.
LEFF 2026 kino festiwaly 13 ýurduň şol sanda Türkmenistanyň, Özbegistanyň, Russiýanyň, Hytaýyň, Hindistanyň, Eýranyň we Belarusyň 40 sany çeper we dokumental filmini bir ýere jemlär. Guramaçylar bilelikdäki önümçiligi we halkara kinematografik taslamalary ösdürmäge aýratyn ähmiýet berýärler. Bu nukdaýnazardan Magtymguly Pyragy baradaky film döwletara döredijilik hyzmatdaşlygynyň üstünlikli nusgasy hökmünde çykyş edýär.
