Özbegistanda «Iroki» halkara senetçilik we keşdeçilik baýramçylygy geçirilýär
13–15-nji awgust aralygynda Özbegistanyň Kaşkadarýa welaýatynyň Şahrisabz etrabynda «Iroki» halkara keşdeçilik festiwaly geçirilýär. Çäräniň esasy maksady köp asyrlyk el hünäri däplerini gorap saklamak, myhmanlary seýrek duş gelýän keşdeçilik usullary bilen tanyşdyrmak we dürli ýurtlardan gelen ussatlary birleşdirmekden ybarat. Bu barada Yuz.uz habar berýär.
Festiwala Özbegistanyň ähli sebitlerinden we goňşy döwletlerden iň ussat keşdeçiler gatnaşýarlar. Çärä gelen myhmanlar diňe bir el hünäri ussatlarynyň täsin eserlerini synlamak bilen çäklenmän, eýsem milli senetçiligiň inçe usullaryny hem öwrenip bilerler.
Üç günüň dowamynda gatnaşyjylar we myhmanlar üçin şu çäreler guralýar:
• Sergiler we tanyşdyryşlar: milli keşdeçilik işleriniň we halk senetçiliginiň önümleriniň täsin nusgalary görkezilýär;
• Okuw ussatlyk sapaklary: tejribeli senetçiler tarapyndan milli nagyşlary döretmek boýunça sapaklar geçirilýär;
• Tejribe alyşmak: medeni gatnaşyklary ösdürmek maksady bilen özbek we daşary ýurtly ussatlaryň duşuşyklary geçirilýär;
• Medeni maksatnama: täsirli konsertler we dürli güýmenje çäreleri guralýar.
«Iroki» baýramçylygy senetçileri goldamaga, milli sungaty ýaşlaryň arasynda giňden wagyz etmäge we syýahatçylary çekmäge ýardam berýär. Bu çäre halkara medeni dialogy pugtalandyrmak we özboluşly milli mirasy geljekki nesillere geçirmek üçin möhüm meýdança bolup hyzmat edýär.
ORIENT
