«KIDS EXPO: Ähli zat çagalar üçin» atly sergisinde halkara kitap ýarmarkasy geçiriler
Kitaplar, okamak, edebiýat täzelikleri we çagalar üçin interaktiw çäreler — halkara kitap ýarmarkasy KIDS EXPO 2026 sergisiniň esasy we gyzykly bölümleriniň birine öwrüler.
2026-njy ýylyň 19–22-nji awgusty aralygynda Aşgabatda çagalar we ulular üçin niýetlenen giň kitap meýdançasy dörediler. Bu ýerde myhmanlar täze neşirler bilen tanyşyp, tutuş maşgala üçin kitaplary saýlap alar we edebi çäreleriň geçirilmegine gatnaşyp bilerler.
Ýarmarkada çagalar, ene-atalar we tutuş maşgala üçin dürli dillerde neşir edilen kitaplaryň giň görnüşi hödürlener. Olaryň arasynda çeper, bilim beriji, öwrediji we ösdüriji edebiýatlar, çagalaryň terbiýesine we ösüşine bagyşlanan kitaplar, maşgala bolup okamaga hem-de özbaşdak bilim almaga niýetlenen neşirler bar.
Kitap ýarmarkasyna kitaphanalar, kitap dükanlary, şeýle hem halkara medeni guramalar — Türkmenistandaky Fransuz instituty we Eýranyň Türkmenistandaky medeni merkezi gatnaşar. Olaryň gatnaşmagy myhmanlara dürli ýurtlaryň edebi däplerini, dillerini we medeniýetlerini giňden tanamaga, täze neşirler we eserler bilen tanyşmaga mümkinçilik berer.
Kitap bölümi diňe bir kitap okamaga höwesli adamlar üçin däl, eýsem ähli myhmanlar üçin gyzykly bolar. Olar kitaplary satyn alyp, täze neşirler bilen tanyşyp we çagalar üçin guraljak interaktiw maksatnama gatnaşyp bilerler. Ýaş myhmanlar üçin edebi okaýyşlar, bäsleşikler, öwrediji oýunlar we beýleki çäreler meýilleşdirilýär. Bu çäreler çagalaryň kitap bilen tanyşlygyny gyzykly wakalara öwürmäge ýardam eder.
Maşgala bolup kitap okamaga we çagalar bilen ýetginjekleriň arasynda edebiýata bolan gyzyklanmany artdyrmaga aýratyn üns berler. Ene-atalar çagalary üçin kitap saýlap, çaganyň terbiýesi we ösüşi baradaky edebiýatlar bilen tanyşyp, şeýle hem özleri üçin okamak we özbaşdak bilim almak maksady bilen niýetlenen neşirleri tapyp bilerler. Ýaş myhmanlar bolsa täsin wakalar, ýazyjylar we edebi gahrymanlar bilen tanyşarlar.
Halkara kitap ýarmarkasy kitaplary, bilimi, döredijiligi we maşgala dynç alşyny birleşdirýän «KIDS EXPO 2026» medeni-bilim maksatnamasynyň bir bölegi bolar.
«KIDS EXPO: Ähli zat çagalar üçin» atly halkara sergi-ýarmarkasy geljek hepde Aşgabat şäherindäki Türkmenistanyň Söwda-senagat edarasynyň Sergi merkezinde geçiriler.
Serginiň guramaçylary bolup Türkmenistanyň Söwda-senagat edarasy we «Turkmen Expo» kompaniýasy çykyş edýär.
