«Garri Potter» eseriniň muşdaklary Dobbiniň «mazaryny» elektrik kabelinden halas etdiler
Beýik Britaniýa bilen Irlandiýanyň arasynda amala aşyrylýan, millionlarça funt sterling möçberindäki energiýa taslamasynyň ugruny «Garri Potter»-iň muşdaklarynyň nägileliklerinden soň üýtgetmeli boldular.
Käwagt iri infrastruktura taslamasynyň ykbalyny diňe inženerler ýa-da ekologik aktiwistler däl-de, eýsem… öý elfiniň muşdaklary hem üýtgedip bilýär. Hut şeýle ýagdaý Beýik Britaniýanyň we Irlandiýanyň energetika ulgamlaryny birleşdirmeli Greenlink taslamasynda bolup geçdi.
Başlangyç meýilnama boýunça takmynan 430 million funt sterling bahasyndaky ýokary woltly kabeliň ugry Uelsiň Pembrukşir sebitindäki Freshwater West kenarynyň üstünden geçmelidi. Hut şu ýerde «Garri Potter we ölüm sowgatlary: 1-nji bölüm» filmindäki Dobbiniň aradan çykýan sahnasy surata düşürilipdi.
Film görkezilenden soň, «Garri Potter»-iň muşdaklary bu ýeri söýgüli gahrymanynyň hormatyna resmi däl ýadygärlige öwürdiler. Kenarda Dobbiniň ady ýazylan nyşan peýda boldy, gelýänler bolsa üstünde dürli ýazgylar bolan daşlary we joraplary goýup başladylar. Bu bolsa öý elfininiň azat bolşy baradaky meşhur wakany ýatladýardy.
Muşdaklar geljekki kabeliň hut şu ýadygärligiň üstünden geçip biljekdigini bilenlerinde, hakyky «jadylanan» tolgunyşyk başlandy.
«Dobbiniň mazaryna howp abanýar»
Etchea Energy konsalting kompaniýasynyň baş direktory Saýmon Ladlamyň aýtmagyna görä, taslamanyň toparyna nägile bolan muşdaklardan ýüzlerçe telefon jaňy gelip gowuşdy.
Ilkibaşda taslamanyň wekilleri bu ýagdaýa geň galdylar: gürrüň ahyryn toslama gahrymana bagyşlanan ýadygärlik barada gidýärdi.
Emma meýilleşdirijiler bilen geçirilen ara alyp maslahatlaşmalardan soň kabeliň ugruny üýtgetmek kararyna gelindi. Şeýlelikde, kabel muşdaklaryň Dobbiniň «mazary» hasaplaýan ýerinden geçmez ýaly edildi.
Şeýlelikde, sebitdäki iri energetika taslamalarynyň biri meşhur kitap we film eseriniň gahrymanyna bolan muşdaklaryň duýgulary sebäpli bölekleýin başga ugra gönükdirildi.
Greenlink taslamasy Irlandiýa bilen Beýik Britaniýanyň arasynda çekilýän, umumy uzynlygy takmynan 190 kilometre ýetýän ýokary woltly kabel infrastrukturasyny öz içine alýar. Taslama 2025-nji ýylda başlanyp, takmynan 380 müň hojalygy elektrik energiýasy bilen üpjün etmäge niýetlenendir.
Indi energetika baglanyşygy öz işini dowam etdirip biler, Dobbiniň ýadygärligi bolsa öňküsi ýaly ýerinde galar.
Görnüşi ýaly, jady diňe Hogwartsta bolmaýar. Käwagt kabeliň ugruny üýtgetmek üçin birnäçe ýüz muşdagyň telefon jaňy hem ýeterlik bolýar.
Dobbi azat. Görnüşinden, ol energetika infrastrukturasynyň täsirinden hem goragly.
