Gar barsy — Merkezi Aziýanyň belent daglarynyň seýrek duş gelýän eýesi Gyrgyzystanda fotokameralara düşdi
Gyrgyzystanyň «Çon-Kemin» döwlet tebigy seýilgähinde geçmesi kyn bolan dag gerişlerinde oturdylan fotoduzaklaryň ulgamynyň monitoringiniň netijeleri jemlendi. Gizlin kameralaryň obýektiwine belent daglaryň seýrek duş gelýän eýesi — gar barsy (irbis), şeýle hem Týan-Şan ularlarynyň (dag hindi guşlarynyň) tutuş maşgalasy düşdi.
Gar barsy ýitip gitmek howpy abanýan görnüş hökmünde Tebigaty goramagyň halkara birleşiginiň (IUCN) Gyzyl kitabyna girizilendir. Merkezi Aziýada onuň goralýan tebigy seýilgähleriň çäginde ýüze çykarylmagy esasy «biomarkerleriň» biri hasaplanýar: eger ýyrtyjy yzygiderli hasaba alynýan bolsa, bu sebitde ýabany toýnakly haýwanlaryň durnukly populýasiýasynyň we arassa ekoulgamynyň saklanyp galýandygyny görkezýär.
Gar barsyndan başga-da, fotoduzaklar deňiz derejesinden 3000 metrden gowrak belentlikde ulalan jüýjeleri bilen Gimalaý ularlaryny hem surata düşürdi.
Ekologlaryň bellemegine görä, awtonom kameralaryň ulanylmagy belent daglardaky haýwanat dünýäsiniň gizlin durmuşyny adamyň goşulyşmazlygynda öwrenmäge mümkinçilik berýär. Şeýle hem bu tehnologiýa sebitdäki serhetara dag ulgamlarynda brakonerçilige garşy gözegçilik işlerini utgaşdyrmaga ýardam edýär.
