«Focus Business Türkiye» žurnalynyň täze sany çykdy: iýul aýynyň netijeleri, rekord eksport we täze bazarlar
Türkiýe Respublikasynyň Söwda ministrligi resmi işewür žurnal bolan «Focus Business Türkiye» neşiriniň täze sanyny hödürledi. Neşir Türkiýe bilen söwda-ykdysady gatnaşyklary giňeltmäge we täze halkara hyzmatdaşlary gözlemäge gyzyklanýan işewürler jemgyýetiniň wekilleri, eksport edijiler we analitikler üçin niýetlenendir.
Täze sanynyň esasy temalary we görkezijileri:
— Eksport boýunça rekord görkezijiler: 2026-njy ýylyň iýul aýynda Türkiýäniň eksporty 2,9% ýokarlanyp, 25,6 milliard ABŞ dollaryna ýetdi. Bu ýurduň taryhyndaky ikinji iň ýokary görkeziji boldy. Eksportyň soňky 12 aýdaky möçberi bolsa rekord derejä — 278,6 milliard ABŞ dollaryna ýetdi.
— Halkara integrasiýa: Türkiýe resmi taýdan ASEAN-yň 12-nji dialog hyzmatdaşynyň derejesini aldy. Bu ýagdaý 4 trillion dollardan gowrak möçberde bahalandyrylýan Günorta-Gündogar Aziýa bazarynda täze mümkinçilikleri açýar.
— Esasy hyzmatdaşlyk ugurlary: Neşirde Kanada bilen erkin söwda zolagy baradaky gepleşikleriň başlanmagy, Beýik Britaniýa bilen söwdanyň täzelenen şertleri we Yrak bilen baglaşylan ylalaşyklaryň toplumy barada giňişleýin maglumat berilýär.
— Senagat we önümçilik: Türkiýäniň goranyş we aerokosmiki senagatynyň iýul aýyndaky eksporty 14,4% ýokarlandy. Şeýle hem ýurt polat önümçiligi boýunça dünýäde 7-nji orna çykdy.
— Sergiler we işewür aragatnaşyklar: Žurnalda 2026-njy ýylda geçiriljek halkara söwda sergileriniň (gurluşyk, dokma, energetika, azyk senagaty we beýleki ugurlar) döwrebap senenamasy, şeýle hem täjirçilik tekliplerini ibermek üçin söwda wekilhanalarynyň göni aragatnaşyk maglumatlarynyň sanawy ýerleşdirildi.
Žurnalyň doly görnüşi aşakdaky QR-belgisi arkaly elýeterlidir:
ORIENT
