Türkmenistanyň ýokary okuw mekdepleriniň talyplary Malaýziýada energetika boýunça tomusky okuw maksatnamasyna gatnaşdylar
Türkmenistanyň öňdebaryjy üç tehniki ýokary okuw mekdebiniň talyplary Malaýziýada geçirilen «Uniten Energy Adventure – Summer Camp» atly halkara maksatnamasyna gatnaşdylar.
23-nji iýuldan 4-nji awgust aralygynda ýaş hünärmenler Tenaga Nasional uniwersitetiniň (UNITEN) binýadynda energetika pudagynyň öňdebaryjy tehnologiýalaryny öwrendiler we ýurduň medeniýeti bilen tanyşdylar.
Bu sapar UNITEN bilen Türkmenistanyň Binagärlik-gurluşyk instituty, Oguz han adyndaky Inžener-tehnologiýalar uniwersiteti hem-de Döwlet energetika institutynyň arasynda baglaşylan talyp alyş-çalyş ylalaşygynyň çäklerinde amala aşyryldy.
Okuw maksatnamasy amaly ylmy we intensiw okuwy özünde jemledi. Talyplar uniwersitetiň Maglumat-serişde merkezinde işlediler, öňdebaryjy bilermenler bilen duşuşdylar we UNITEN-iň döwrebap barlaghanalarynda tejribe geçdiler. Sapaklaryň dowamynda olar Gün energiýasy ulgamlarynyň, bioenergetikanyň, robototehnikanyň we PERL ylmy-barlag merkeziniň işi bilen tanyşdylar, şeýle hem gaýtadan dikeldilýän energiýa çeşmeleri we maglumatlary seljermek boýunça seminarlara gatnaşdylar.
Okuwlar baý medeni maksatnama bilen utgaşdyryldy. Türkmen talyplary Malaýziýanyň esasy gözel ýerlerine, şol sanda meşhur Saloma köprüsine we Soltan Abdul Samadyň taryhy binasyna baryp gördüler, ýurduň däp-dessurlary we binagärligi bilen ýakyndan tanyşdylar.
Maksatnamanyň üstünlikli geçirilmegi UNITEN-iň mugallymlarynyň we meýletinçi talyplarynyň sazlaşykly zähmeti netijesinde mümkin boldy. Bu okuw maksatnamasy ýaş türkmen hünärmenleriniň hünär derejesini ýokarlandyrmak, halkara bilim hyzmatdaşlygyny pugtalandyrmak hem-de «ylym – bilim – önümçilik» konsepsiýasyny ösdürmek üçin netijeli meýdança boldy.
ORIENT
