Brýusseldäki Türkmenistanyň ilçihanasy Aziýa ýurtlaryndan gelen geljekki diplomatlar üçin duşuşyk geçirdi
Türkmenistanyň Belgiýa Patyşalygyndaky ilçihanasy Ýewropa institutlarynyň işini we häzirki zaman diplomatiýasynyň amaly ugurlaryny öwrenmek maksady bilen Brýussele gelen Aziýa ýurtlarynyň 30 talybyndan ybarat bolan topary kabul etdi.
Ilçi Sapar Pälwanow ýaş hünärmenleri Türkmenistanyň daşary syýasatynyň esasy ileri tutulýan ugurlary bilen tanyşdyrdy. Bu syýasat hemişelik Bitaraplyk, parahatçylyk söýüjilik we hoşniýetli goňşuçylyk ýörelgelerine esaslanýar. Duşuşygyň dowamynda diplomat Aşgabat tarapyndan öňe sürülýän halkara parahatçylyk başlangyçlary, Ýewropa Bileleşigi bilen hyzmatdaşlygyň ösdürilmegi we ýurduň durmuş-ykdysady ösüşiniň esasy ugurlary barada gürrüň berdi. Şeýle hem sentýabr aýynda geçiriljek Türkmenistanyň Halk Maslahatynyň nobatdaky mejlisiň öňisyrasynda Halk Maslahatynyň döwlet dolandyryşyndaky orny barada maglumat berdi.
Duşuşykda Türkmenistanyň medeni mirasyna we ýurdumyzyň döwlet Garaşsyzlygynyň 35 ýyllygynyň bellenilýän ýyly bolan 2026-njy ýylyň nyşanlaryna aýratyn üns berildi. Ilçi türkmen halkynyň taryhynda ahalteke bedewleriniň eýeleýän orny barada gürrüň berdi hem-de sentýabr aýynda Niderlandlar Patyşalygynda geçirilmegi meýilleşdirilýän giň gerimli medeni we atçylyk çäreleri barada habar berdi.
Çäräniň jemleýji bölegi Türkmenistanyň taryhy, diplomatiýasy we däp-dessurlary baradaky bilimleri barlaýan interaktiw intellektual bäsleşik boldy. Bäsleşigiň ýeňijilerine ýadygärlik sowgatlar gowşuryldy. Baş baýragyň eýesine bolsa däp bolan türkmen halysy sowgat berildi.
Şeýle tanyşdyryş saparlaryny geçirmek Brýusseldäki diplomatik wekilhananyň ýaşlar diplomatiýasyny we medeniýetara dialogy ösdürmäge gönükdirilen yzygiderli işleriniň tejribesine öwrüldi.
