Türkmenistan bilen Tailandyň arasyndaky ilkinji syýasy geňeşmeler 2027-nji ýylda geçiriler
Türkmenistan bilen Tailand Patyşalygy iki taraplaýyn gatnaşyklaryň taryhynda ilkinji gezek daşary işler ministrlikleriniň arasyndaky syýasy geňeşmeleri 2027-nji ýylda geçirerler. Bu duşuşygyň geçirilmegi iki döwletiň arasynda diplomatik gatnaşyklaryň ýola goýulmagynyň 35 ýyllygyna bagyşlanýar.
Syýasy-diplomatik özara gatnaşyklary täze derejä çykarmak baradaky ylalaşyk Bankokda, Türkmenistanyň Ilçisi Muhammetnýaz Maşalowyň Tailandyň DIM-niň Günorta Aziýa, Ýakyn Gündogar we Afrika işleri boýunça departamentiniň baş direktory Urasa Mongkolnawin bilen geçiren gepleşikleriniň dowamynda gazanyldy.
Ýubileý senesine taýýarlyk görmegiň çäklerinde iki ýurduň diplomatlary ýokary derejedäki gatnaşyklary işjeňleşdirmek boýunça çäreleriň toplumyny ylalaşdylar. Hyzmatdaşlygyň ileri tutulýan ugurlarynyň hatarynda söwda, maýa goýum işjeňligi, energetika, ulag-logistika ulgamy, bilim we syýahatçylyk bellenildi. Mundan başga-da, taraplar BMG-niň we beýleki iri halkara düzümleriň meýdançalarynda tagallalary utgaşdyrmaga hem-de başlangyçlary özara goldamaga ygrarlydyklaryny tassykladylar.
