Türkmenistanyň ýokary okuw mekdepleriniň mugallymlary Fransiýanyň Nissa şäherinde dil tejribeligini geçdiler
19-njy iýuldan 1-nji awgusta çenli aralykda Türkmenistandan fransuz dili mugallymlarynyň dördüsi Nissa şäherindäki Francophonia bilim merkezinde intensiw mugallymçylyk tejribeligini geçdiler. Taslama Türkmenistandaky Fransuz institutynyň utgaşdyrmagynda, Fransiýanyň Ýewropa we Daşary işler ministrliginiň Fonds Équipe France maksatnamasynyň çäklerinde amala aşyryldy.
Türkmen wekiliýetiniň düzümine Magtymguly adyndaky Türkmen döwlet uniwersitetiniň bir wekili hem-de Döwletmämmet Azady adyndaky Türkmen milli dünýä dilleri institutynyň üç fransuz dili mugallymy girdi. Bu başlangyç 2025-nji ýylda üstünlikli geçirilen şuňa meňzeş taslamanyň dowamy bolup, Türkmenistanda ýokary okuw mekdeplerinde fransuz dilini okatmagy pugtalandyrmaga gönükdirilen işleri tassyklaýar.
Iki hepdelik maksatnama fransuz dilini daşary ýurt dili hökmünde okatmagyň usulyýeti boýunça nazary we amaly okuwlary, innowasion bilim çemeleşmeleri hem-de sanly gurallar bilen tanyşlygy öz içine aldy. Okuwyň tapawutly aýratynlygy Nissa şäheriniň taryhyna bagyşlanan açyk howadaky sapaklar we dürli ýurtlardan gelen mugallymlar bilen tejribe alyşmaga mümkinçilik beren medeniýetara agşamlary boldy.
Tejribeligiň dowamynda gazanylan bilimler we usulyýet tejribeleri geljekde Türkmenistanyň ýokary okuw mekdeplerinde talyplary okatmak işine ornaşdyrylar.
