Türkmen wekiliýeti Niderlandlarda ahalteke atlarynyň dünýä çempionatyna taýarlygyň barşy bilen tanyşýarlar
Türkmenistanyň wekiliýeti Niderlandlarda geçiriljek ahalteke atlarynyň dünýä çempionatyna we ugurdaş halkara çärelerine taýarlyk boýunça gepleşikleriň dowamynda, Kronenbergedäki “Peelbergen” atçylyk sport merkezini jikme-jik gözden geçirdi.
Wise-premýer Taňryguly Atahallyýewiň ýolbaşçylygyndaky türkmen wekiliýetiniň merkeziň ýolbaşçylary we bu ugurdaky hünärmenler bilen geçiren duşuşygynda tehniki, protokol we logistika ugurlary ylalaşyldy. Wekiliýet sport, medeni we sergi maksatnamalarynyň guraljak ýerleri bolan ýapyk hem-de açyk meýdançalary, türgenleşik meýdanlaryny, tomaşaçylar üçin münberleri we infrastrukturany synlady.
Gözden geçirişiň dowamynda türkmen çapyksuwarlarynyň taýýarlygyna aýratyn üns berildi. Wekiliýetiň agzalary häzirki wagtda Peelbergen atçylyk toplumynda päsgelçiliklerden böküp geçmek (konkur) sporty boýunça tejribelik geçýän türkmen hünärmenleriniň okuwynyň barşy bilen tanyşdylar.
Şol bir wagtyň özünde toplumyň çäginde giň gerimli sergini geçirmek üçin ýörite meýdançalar taýýarlanyldy. Onda türkmen önümleriniň we milli mirasyň sergisi, şeýle hem at esbaplary, atçylyk we ugurdaş tehnologiýalar boýunça ýöriteleşen dünýä belli brendleriň diwarlyklary görkeziler.
Öňde boljak forum Ahalteke bedewleriniň tohumyny dünýäde wagyz etmek maksady bilen Türkmenistanyň çäginden daşarda ilkinji gezek geçirilýän şeýle giň gerimli çäre bolar.
