Türkmenistanyň DIM-de BMG-niň «2028-nji ýyl – Halkara hukuk ýyly» atly Kararnamasyny durmuşa geçirmä badalga berildi
Türkmenistanyň DIM-de Türkmenistanyň başlangyjy bilen Birleşen Milletler Guramasynyň Baş Assambleýasy tarapyndan kabul edilen «2028-nji ýyl – Halkara hukuk ýyly» atly Kararnama bagyşlanan maslahat geçirildi. Aşgabadyň başlangyjy esasynda hödürlenen resminama şu ýylyň 24-nji iýulynda BMG-niň Baş Assambleýasynyň 80-nji sessiýasynyň 106-njy plenar mejlisinde biragyzdan kabul edildi. Taslamanyň awtordaşlary bolup 78 döwlet çykyş etdi.
Maslahata diplomatlar, Türkmenistanyň Döwlet, hukuk we demokratiýa institutynyň ylmy işgärleri şeýle hem Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, Türkmenistanyň Daşary işler ministrliginiň Halkara gatnaşyklary institutynyň alymlary, mugallymlary we talyp ýaşlary gatnaşdylar.
Duşuşygyň esasy netijesi başlangyjy diplomatik derejede goldamak tapgyryndan ony iş ýüzünde durmuşa geçirmek tapgyryna geçilmegi boldy. Türkmenistanyň Daşary işler ministri Raşid Meredow oňa gatnaşyjylary döwlet Baştutany tarapyndan Ministrler Kabinetiniň mejlisinde makullanan çäreleriň toplumyny yzygiderli we netijeli durmuşa geçirmäge çagyrdy.
Başlanan işler iki esasy resminamanyň — 2026–2028-nji ýyllar üçin Hereketleriň milli meýilnamasynyň hem-de «Halkara hukugy we Türkmenistanyň hemişelik Bitaraplygy» atly Milli konsepsiýanyň taslamalarynyň taýýarlanylmagyny öz içine alýar. Bu resminamalar hukuk ugrundaky ylmy barlaglary amaly diplomatiýa bilen utgaşdyrmaga, şeýle hem ýurduň hemişelik Bitaraplyk hukuk derejesiniň häzirki zaman halkara gatnaşyklar ulgamyndaky kanunçylyk binýadyny has-da pugtalandyrmaga gönükdirilendir.
