Microsoft Xbox konsollarynyň bahalaryny ýokarlandyrdy we tygşytlamagyň täze usullaryny hödürledi
Microsoft kompaniýasy 2026-njy ýylyň 1-nji awgustyndan başlap Xbox oýun konsollarynyň bahalarynyň dünýä boýunça ýokarlandyrylandygyny yglan etdi. 512 GB ýat tutumly modelleriň bahasy 100 ABŞ dollaryna, 1 TB görnüşleriniň bahasy bolsa 150 ABŞ dollaryna ýokarlandy. Mundan başga-da, kompaniýa 2 TB ýatly Xbox konsollarynyň önümçiligini doly bes edýär.
Bu çözgüdiň esasy sebäbi hökmünde toplum bölekleriniň bahasynyň düýpli gymmatlamagy görkezilýär. Operatiw ýadyň (RAM) we maglumat saklaýjy enjamlaryň bahasy 2,5 esse-den gowrak ýokarlandy, bilermenler bolsa bu ugurda bahalaryň mundan beýläk hem artmagyna garaşýarlar.
Bahalaryň ýokarlanmagynyň täsirini ýeňilleşdirmek we satyn almagy has elýeterli etmek maksady bilen Microsoft alyjylar üçin birnäçe amatly mümkinçilikleri hödürledi:
• Göterimsiz bölekleýin töleg: resmi dükanlarda harydy bölekleýin töleg bilen satyn almak ýa-da hyzmatdaş maliýe guramalary arkaly 12 aýa çenli göterimsiz maliýeleşdirmek mümkinçiligi.
• Has elýeterli alternatiwa: ulanylan ýa-da resmi taýdan täzeden dikeldilen Xbox konsollaryny esasy bahadan 100 ABŞ dollaryna çenli arzanladyş bilen satyn almak mümkinçiligi.
Mundan başga-da, birnäçe oýun platformasyny ulanýan oýunçylara goşmaça mümkinçilik garaşýar. Ubisoft bilen täze hyzmatdaşlygyň çäklerinde Xbox üçin kesgitlenen oýunlary satyn alan ulanyjylar, şol oýunlaryň PC wersiýasyny Ubisoft Connect hyzmatynda mugt alyp bilerler.
ORIENT
