Aşgabatda «Tatar gyzy» bäsleşiginiň jemleýji tapgyryny geçirmek meseleleri ara alnyp maslahatlaşyldy
Türkmenistanyň Daşary işler ministriniň orunbasary Mähri Bäşimowanyň iş sapary bilen Aşgabada gelen Russiýa Federasiýasynyň Tatarystan Respublikasynyň Premýer-ministriniň orunbasary Wasil Şaýhraziýew bilen duşuşygy geçirildi.
Gepleşikleriň dowamynda taraplar Türkmenistan bilen Tatarystanyň arasynda däp bolan dostlukly hyzmatdaşlygyň ýokary derejede ösdürilýändigini bellediler. Şeýle hem bu hyzmatdaşlygyň Russiýa Federasiýasy bilen strategik hyzmatdaşlygyň çäklerinde üstünlikli dowam etdirilýändigi nygtaldy. Duşuşykda hyzmatdaşlygyň ynsanperwer ugruna aýratyn üns berildi. Taraplar iki halkyň taryhy umumylygynyň, çuňňur medeni gatnaşyklarynyň we ruhy gymmatlyklarynyň bu hyzmatdaşlygyň berk binýadyny emele getirýändigini bellediler.
Duşuşygyň amaly bölegi şu ýylyň oktýabr aýynda Türkmenistanda geçirilmegi meýilleşdirilýän «Tatar gyzy» halkara bäsleşiginiň jemleýji tapgyryna taýýarlyk görmek bilen baglanyşykly guramaçylyk meselelerine bagyşlandy. Taraplar bäsleşigi ýokary derejede geçirmek üçin görülmeli taýýarlyk işleri we özara hyzmatdaşlygyň möhüm ugurlaryny ara alyp maslahatlaşdylar.
