Ekranyň üsti bilen syýahat: Türkiýäniň kinematografik taslamalary halkara baýraga mynasyp boldy
Häzirki zaman syýahatçylyk pudagynda adaty mahabat wideolarynyň ornuny kem-kemden kinematografik hekaýa beýan edişi (cinematic storytelling) eýeleýär. Çeper kyssaçylyk usuly tomaşaçylara diňe bir gözel ýerleri görkezmek bilen çäklenmän, eýsem ýurduň medeniýetine we durmuş ýörelgesine çuňňur aralaşmaga mümkinçilik berýär. Bu çemeleşmäniň netijeliligi ýaňy-ýakynda abraýly US International Awards 2026 halkara bäsleşiginde dünýä derejesinde ykrar edildi.
25 ýurtdan 100-den gowrak jemleýji tapgyra geçenleriň gatnaşan bäsleşiginde Türkiýäniň Syýahatçylygy ilerletmek we ösdürmek agentliginiň (TGA) wizual taslamalary bilermenleriň aýratyn ünsüni çekdi. TGA bilen Turkish Airlines awiakompaniýasynyň bilelikde taýýarlan «So Turkish, Go Turkish» atly mahabat filmi ýurtlary mahabatlandyrmak ugry boýunça kümüş baýraga mynasyp boldy. Bu ýyl degişli ugur boýunça altyn baýrak gowşurylmandygy sebäpli, film iş ýüzünde iň ýokary baha eýe boldy.
Film Türkiýäni diňe bir geografik nokat hökmünde däl-de, eýsem özboluşly durmuş ýörelgesi bolan ýurt hökmünde görkezýär. Aýasofýanyň ajaýyp keşbi, Kapadokiýanyň asmanda ýüzýän howa şarlary we Egeý deňziniň kenaryndaky milli myhmansöýerlik sahnalary tomaşaçylara sebitiň hakyky ruhuny ýetirýär.
Gysga wideolar bilen birlikde, kinematografik hilde taýýarlanan mini-seriallar hem sanly gurşawda uly meşhurlyga eýe bolýar. Ozal çykarylan bäş taslama jemi 7,69 milliard mahabat görkezilişini we dünýä boýunça 4,4 milliarddan gowrak tomaşany toplady. Ýakynda bolsa döredijiler «Turquoise Summer» atly altynjy taslamany hödürlediler.
ABŞ-da geçirilen bäsleşikde Türkiýäniň ýene bir tanyşdyryş taslamasy — «Antalya Gambit» serialy şäherleri mahabatlandyrmak ugry boýunça kümüş baýraga mynasyp boldy.
Serialda sungat kuratory Lara bilen syrly binagär Denis arkaly tomaşaçylar Antalýanyň goýy gök aýlaglaryna, gadymy ýadygärliklerine we häzirki zaman dynç alyş merkezlerine syýahat edýärler. Şeýlelikde, Antalýa diňe bir kenarýaka dynç alyş merkezi däl-de, eýsem baý taryhy bolan sebit hökmünde açylyp görkezilýär.
Şeýle hem, bu ugurda finala çykan «İstanbul My Love» serialy Stambuly wakalaryň işjeň gahrymanyna öwürýär.
Serialyň beýany Stambul atly zehinli gyz bilen üstünlikli telekeçi Tanyň uly şäherde hakyky söýgini gözleýşi barada gürrüň berýär. Şäheriň joşgunyny romantika bilen utgaşdyrýan serial Çyragan köşgüni, Galataporty, Bosfory we Beýogly etrabyny görkezmek arkaly tomaşaçylary bu ýeriň özboluşly ruhuna çuňňur aralaşdyrýar.
Şeýlelikde, ýurduň medeniýetini we durmuş ýörelgesini kinematografik hekaýalar arkaly görkezmek halkara syýahatçylyk bazarynda mahabatlandyrmagyň iň täsirli usullarynyň biri hökmünde barha giňden ykrar edilýär.
