Ankara bilen Aşgabat hyzmatdaşlygyň esasy ugurlary boýunça pikir alyşdy
Ankarada Türkmenistan bilen Türkiýe Respublikasynyň Daşary işler ministrlikleriniň arasynda nobatdaky syýasy geňeşmeler geçirildi. Diplomatik gepleşikler iki ýurduň degişli düzümleriniň ýolbaşçylarynyň derejesinde guraldy. Türkmen tarapyna Türkmenistanyň Daşary işler ministrliginiň Ýakyn Gündogar ýurtlary bölüminiň müdiri Işanguly Amanlyýew, türk tarapyna bolsa Türkiýäniň Daşary işler ministrliginiň Merkezi Aziýa we Türki döwletleri guramasy boýunça Baş müdirliginiň ýolbaşçysy Togan Oral ýolbaşçylyk etdi. Saparyň çäklerinde türkmen wekiliýeti Türkiýäniň daşary işler ministriniň orunbasary Aýşe Berris Ekinji bilen hem aýratyn duşuşyk geçirdi.
Duşuşyklaryň dowamynda diplomatlar amaly meseleleriň giň toplumyny ara alyp maslahatlaşdylar. Taraplar ministrlikleriň we beýleki döwlet edaralarynyň arasynda yzygiderli geçirilýän dialogyň hyzmatdaşlygy pugtalandyrmagyň esasy şertleriniň biridigini bellediler. Gepleşiklerde ýokary derejedäki geljekki duşuşyklara taýýarlyk görmek, şertnama-hukuk binýadyny kämilleşdirmek, parlamentara gatnaşyklary ösdürmek hem-de konsullyk meselelerine aýratyn üns berildi.
Gepleşikleriň ykdysady böleginde söwda, energetika, ulag we gurluşyk ulgamlarynda hyzmatdaşlygy giňeltmegiň geljegi ara alnyp maslahatlaşyldy. Bilelikdäki taslamalary utgaşykly ilerletmek maksady bilen, taraplar Türkmen-türk hökümetara toparynyň hem-de Işewürler geňeşiniň möhüm orun eýeleýändigini nygtadylar.
Halkara guramalarynyň çäklerinde alnyp barylýan hyzmatdaşlyga hem aýratyn üns berildi. Daşary syýasat edaralarynyň wekilleri abraýly halkara we sebit guramalarynyň, şol sanda Türki Döwletleri Guramasynyň çäklerinde öňe sürülýän başlangyçlary özara goldamaga taýýardyklaryny tassykladylar. Şeýle hem taraplar ylym, bilim, saglygy goraýyş we sport ugurlaryny öz içine alýan ynsanperwer-medeni dialogy yzygiderli giňeltmäge özara gyzyklanma bildirýändiklerini beýan etdiler.
Şol bir wagtyň özünde Aşgabatda Türkmenistanyň daşary işler ministriniň orunbasary Ahmet Gurbanov Türkiýäniň Içeri işler ministrliginiň Migrasiýa meseleleri boýunça müdirliginiň başlygynyň orunbasary Ramazan Seçilmiş bilen duşuşdy. Duşuşygyň esasy mazmuny migrasiýa we konsullyk hyzmatdaşlygy babatda şertnama-hukuk binýadyny kämilleşdirmek boldy. Degişli edaralaryň wekilleri bu ugur boýunça täze resminamalaryň taslamalaryna garadylar hem-de iki ýurduň raýatlarynyň hukuklarynyň ygtybarly goralmagyny üpjün etmek maksady bilen tejribe alyşmagy yzygiderli dowam etdirmäge taýýardyklaryny tassykladylar.
