Pekinde “Umumy geljek üçin ýaşlaryň ösüşi 2026” atly halkara tomusky merkezler öz işine başlady
20-nji iýulda Pekinde “Umumy geljek üçin ýaşlaryň ösüşi 2026” (Youth Development for a Shared Future 2026) atly halkara tomusky merkeziň açylyş dabarasy geçirildi. Bu çäre dünýäniň dürli ýurtlaryndan gelen talyplary, ýaş hünärmenleri we zehinli ýaş liderleri bir ýere jemledi.
Merkeziň işine Türkmenistandan 80-den gowrak wekil, şeýle hem Pakistan, Ispaniýa, Malaýziýa, Russiýa, Taýland we Sloweniýa ýaly 15 döwletden gelen ýaşlar gatnaşýar.
Açylyş dabarasyna Sun Szinlin Hytaý haýyr-sahawat gaznasynyň ýolbaşçylary we Türkmenistanyň Daşary işler ministrliginiň wekilleri gatnaşdylar. Çykyş edenler bu taslamanyň medeniýetara gatnaşyklary pugtalandyrmakda we gatnaşyjylaryň amaly başarnyklaryny ösdürmekde möhüm ähmiýetiniň bardygyny bellediler.
Başlangyjyň esasy maksady medeni alyş-çalşygy ösdürmekden, toparlaýyn hyzmatdaşlygy güýçlendirmekden we halkara dostlugy berkitmekden ybaratdyr. Merkeziň maksatnamasyna interaktiw okuwlar, bilim sessiýalary, döredijilik bäsleşikleri we bilelikdäki taslamalar girýär.
Bu meýdança ýaşlara öz tejribelerini paýlaşmaga, täze pikirleri ara alyp maslahatlaşmaga hem-de geljekki bilelikdäki başlangyçlar üçin uzak möhletli aragatnaşyklary ýola goýmaga mümkinçilik berýär.
ORIENT
