Fransiýanyň abraýly ESSEC biznes mekdebi Türkmenistanda bilim maksatnamalaryny ýola goýmagy meýilleşdirýär
Türkmenistanyň Fransiýadaky Adatdan daşary we Doly ygtyýarly ilçisi Maksat Çaryýew bilen Fransiýanyň abraýly ESSEC biznes mekdebiniň ýerine ýetiriji wise-prezidenti Žýulýen Moloreniň Pariždäki Türkmenistanyň diplomatik wekilhanasynda geçiren duşuşygynyň esasy mowzugy türkmen ýokary bilim ulgamynyň Ýewropa bilim giňişligine integrasiýa mümkinçilikleri boldy.
1907-nji ýylda döredilen ESSEC Fransiýanyň hem-de dünýäniň menejment, ykdysadyýet we döwlet dolandyryşy ugurlarynda iň gadymy, abraýly we öňdebaryjy ýokary okuw mekdepleriniň biridir. Mekdebiň Singapurda we Marokkoda kampuslary bolup, ol ýokary derejeli dolandyryjylary taýýarlamak, sanly özgertmeler we durnukly ösüş ugurlarynda ýöriteleşýär.
Duşuşygyň dowamynda Žýulýen Moloren fransuz tarapynyň Türkmenistanyň bilim bazaryna çykmaga uly gyzyklanma bildirýändigini aýtdy. ESSEC ýolbaşçylygy türkmen talyplary we mugallymlary üçin akademiki alyş-çalyş maksatnamalaryny ýola goýmagy, bilelikdäki ylmy taslamalary durmuşa geçirmegi, şeýle hem Türkmenistanyň ministrlikleriniň, pudaklaýyn dolandyryş edaralarynyň we işewürlik düzümleriniň ýolbaşçylary üçin ýörite hünär kämilleşdiriş okuwlaryny guramagy teklip etdi.
Öz gezeginde Maksat Çaryýew bilim ulgamynda halkara hyzmatdaşlygyny ösdürmegiň we täze nesil hünärmenlerini taýýarlamagyň Türkmenistanyň döwlet syýasatynyň strategik ileri tutulýan ugurlarynyň biridigini nygtady. Diplomat fransuz tarapyny 2025-nji ýylda döredilen Türkmenistandaky Halkara senagatçylar we telekeçiler uniwersitetiniň mümkinçilikleri bilen giňişleýin tanyşdyrdy. Häzirki zaman ykdysadyýeti, innowasion tehnologiýalar we dolandyryş ugurlary boýunça hünärmenleri taýýarlamaga gönükdirilen bu täze ýokary okuw mekdebi fransuz hyzmatdaşlary bilen uzak möhletleýin hyzmatdaşlyk üçin amatly binýat hökmünde garalýar.
Duşuşygyň netijesinde taraplar hyzmatdaşlygyň anyk ugurlaryny içgin işläp taýýarlamak hem-de özara hyzmatdaşlygyň ýol kartasyny düzmek maksady bilen iş gatnaşyklaryny dowam etdirmek barada ylalaşdylar.
