Çagalaryň bilim almagyna gönükdirilen maksatly maýa goýumlar üçin seljeriş «optikasy»
JEMGYÝET, 23-nji iýul | ORIENT. Aşgabatda Birleşen Milletler Guramasynyň Çagalar gaznasy (ÝUNISEF) bilen Türkmenistanyň Bilim ministrliginiň bilelikde guramagynda amaly okuw maslahaty geçirildi. Duşuşygyň esasy temasy maglumatlaryň uly toplumlaryny bilim ulgamyndaky anyk döwlet çözgütlerine we maksatly maýa goýumlara öwürmäge mümkinçilik berýän MICS-EAGLE atly global seljeriş ulgamyny iş ýüzünde ulanmak boldy.
Seminara Mejlisiň deputatlary, esasy ministrlikleriň — Bilim, Saglygy goraýyş, Maliýe, Zähmet we ilaty durmuş taýdan goramak ministrlikleriniň wekilleri, şeýle hem Döwlet, hukuk we demokratiýa institutyň işgärleri gatnaşdylar. Gatnaşyjylaryň düzümi toplumlaýyn-strategik çemeleşmäniň bardygyny görkezýär: MICS maglumatlary diňe bir hasabat hökmünde däl-de, eýsem maşgala we çagalyk ulgamyny goldamak boýunça durmuş syýasatyny kemala getirmek üçin subutnamalara esaslanýan maglumat binýady hökmünde garalýar. Bu barada ORIENT yzygiderli habar berýär.
MICS-EAGLE usulyýetiniň kömegi bilen bilermenler möhüm görkezijileri seljerdiler. Olaryň arasynda başlangyç synp okuwçylarynyň okamak we hasaplamak boýunça esasy endikleri, ýaşlaryň maglumat-kommunikasiýa tehnologiýalary (IKT) boýunça başarnyklary, şeýle hem çagalaryň mekdebe taýýarlyk derejesi ýaly ugurlar bar.
Şeýle jikme-jik (bölünip seljerilen) seljermäniň esasy ähmiýeti — dürli toparlara degişli çagalaryň arasynda bilim derejesindäki tapawutlary ýüze çykarmak we olaryň öňündäki görünmeýän päsgelçilikleri anyk kesgitlemek mümkinçiligidir.
Seminaryň amaly bölümi seljeriş ýazgylaryny taýýarlamaga bagyşlandy. Bu resminamalar býujet serişdelerini her bir çaganyň sazlaşykly ösüşi üçin iň ýokary netijäni berjek ugurlara gönükdirmäge mümkinçilik berer.
