Gurbanguly Berdimuhamedow we Serdar Berdimuhamedow Şawkat Mirziýoýewi doglan güni bilen gutladylar
24-nji iýulda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen Özbegistan Respublikasynyň Prezidenti Şawkat Mirziýoýewiň arasynda telefon arkaly söhbetdeşlik geçirildi.
Türkmenistanyň Halk Maslahatynyň Başlygy dostlukly döwletiň Baştutanyny doglan güni bilen tüýs ýürekden gutlap, Prezident Şawkat Mirziýoýewe berk jan saglyk, uzak ömür, egsilmez güýç-kuwwat, jogapkärli döwlet işinde üstünlikleri arzuw etdi. Şeýle hem Gurbanguly Berdimuhamedow Özbegistanyň Prezidentine Türkmenistanyň Prezidenti Serdar Berdimuhamedowyň mähirli salamyny, doglan güni mynasybetli tüýs ýürekden gutlaglaryny ýetirdi.
Prezident Şawkat Mirziýoýew mähirli gutlaglar we hoşniýetli arzuwlary üçin tüýs ýürekden hoşallyk bildirip, häzirki wagtda iki ýurduň arasynda däp bolan dostlukly gatnaşyklara, ynanyşmaga, özara düşünişmäge esaslanýan hyzmatdaşlygyň ýokary derejä çykarylandygyny kanagatlanma bilen belledi hem-de pursatdan peýdalanyp, Prezident Serdar Berdimuhamedowa mähirli salamyny ýetirmegini haýyş etdi.
Söhbetdeşligiň dowamynda türkmen halkynyň Milli Lideri “Şeýle şanly günde üstünlikler, gowy netijeler, asylly başlangyçlar we meýilnamalar barada gürrüň edilýär. Bularyň hemmesi Sizde bar” diýip, aýratyn nygtady hem-de Prezident Şawkat Mirziýoýew tarapyndan alnyp barylýan döwlet syýasatynyň öz netijelerini berýändigini, özbek jemgyýetiniň, ýurduň her bir raýatynyň durmuşyny täze many-mazmun bilen baýlaşdyrýandygyny, doganlyk özbek halkynyň ägirt uly ruhy-medeni, maddy kuwwatynyň durmuşa geçirilmegini üpjün edýändigini belledi.
Gepleşikleriň möhüm ugurlarynyň biri daşary syýasat ugrundaky tagallalary utgaşdyrmak boldy. Gurbanguly Berdimuhamedow Türkmenistanyň hemişelik Bitaraplyga esaslanýan daşary syýasat ugruny üýtgewsiz goldaýandygy üçin özbek tarapyna minnetdarlyk bildirdi we ýakyn wagtda Aşgabadyň BMG-niň Baş Assambleýasynyň 81-nji sessiýasyndaky ileri tutýan garaýyşlaryny resmi taýdan yglan etjekdigini habar berdi. Bu ugurdaky çemeleşmeleriň köp babatda Özbegistanyň garaýyşlary bilen gabat gelýändigini belledi.
Mundan başga-da, oktýabr aýynda «Awaza» milli syýahatçylyk zolagynda geçirilmegi meýilleşdirilýän iri halkara sammitlerine we forumlaryna taýýarlyk görmekde Özbegistanyň aýratyn orny nygtaldy. Bu çäreleriň bilelikdäki guramaçylygy Merkezi Aziýada we Hazar deňzi sebitlerinde durnukly ösüşi pugtalandyrmaga gönükdirilendir.
Gepleşikleriň dowamynda taraplar ikitaraplaýyn hyzmatdaşlygyň strategik ugurlaryny hem ara alyp maslahatlaşdylar. Hususan-da, türkmen halkynyň Milli Lideri hyzmatdaşlygy has-da çuňlaşdyrmak boýunça birnäçe möhüm başlangyçlary öňe sürdi. Olaryň hatarynda Senagat-tehnologiýa zolagyny döretmek, serhet ýakasynda logistika merkezini gurmak we «Türkmenistan – Özbegistan» Ýokary geňeşini döretmek ýaly teklipler bar.
Türkmenistanyň Prezidentiniň gutlag haty
Türkmenistanyň Prezidenti Serdar Berdimuhamedow Özbegistan Respublikasynyň Prezidenti Şawkat Mirziýoýewe doglan güni mynasybetli tüýs ýürekden gutlaglaryny we iň gowy arzuwlaryny iberdi.
Türkmen döwletiniň Baştutany ýüzlenmesinde döwletara dialogyň strategik häsiýetine aýratyn üns berdi:
“Siziň alyp barýan parasatly syýasatyňyz netijesinde Özbegistan yzygiderli ösýär we halkara giňişlikde öz abraýyny pugtalandyrýar. Türkmenistan bilen Özbegistan Respublikasynyň arasyndaky däp bolan dostlukly gatnaşyklaryň, hemmetaraplaýyn strategik hyzmatdaşlygyň ösdürilmegine Siziň goşýan şahsy goşandyňyza ýokary baha berýäris” diýip, Serdar Berdimuhamedow hatynda belleýär.
Döwlet Baştutany iki halkyň arasyndaky umumy taryhy-medeni, ruhy gymmatlyklara esaslanýan gatnaşyklaryň hakyky doganlygyň aýdyň mysaly bolup durýandygyny nygtap, bu gatnaşyklaryň mundan beýläk-de halklarymyzyň bähbidine pugtalandyryljakdygyna berk ynam bildirdi. Türkmenistanyň Prezidenti ýakymly mümkinçilikden peýdalanyp, Prezident Şawkat Mirziýoýewe berk jan saglyk, bagtyýarlyk we jogapkärli döwlet işinde uly üstünlikleri, Özbegistan Respublikasynyň halkyna bolsa parahatçylyk, rowaçlyk arzuw etdi.
