Oksfordda ilkinji meýletinçä Bundibugýo Ebola wirusyna garşy sanjym edildi
Oksfordda ilkinji meýletinçä Bundibugýo Ebola wirusyna garşy sanjym edildi. Dünýä täze howp bilen ýüzbe-ýüz bolanda, onuň ýaýramagynyň öňüni alyp biljek ýeke-täk galkan ylym bolup durýar. Halkara derejede adatdan daşary ýagdaý hökmünde yglan edilen Bundibugýo Ebola wirusy uzak wagtlap oňa garşy ýörite gorag serişdelerisiz galypdy. Emma häzirki wagtda Oksfordyň alymlarynyň we olaryň hyzmatdaşlarynyň tagallalary netijesinde adamzat bu ölüm howply wirusa garşy sanjym döretmek ugrunda ilkinji ädimi ätdi. Konsepsiýadan kliniki synaglara çenli bary-ýogy sekiz hepde gerek boldy. Bu bolsa ylym tutanýerlilik bilen utgaşanda, iň çylşyrymly kynçylyklary hem ýeňip bolýandygyny görkezýär.
Anna güni Oksford uniwersiteti dünýäde ilkinji gezek Bundibugýo Ebola wirusyndan goramak üçin niýetlenen sanjymyň kliniki synagynyň çäklerinde ilkinji meýletinçiniň üstünlikli sanjym edilendigini habar berdi. Bu waka Bundibugýo Ebola wirusyna garşy döredilen ChAdOx1 sanjymynyň ilkinji gezek adamda ulanylmagyny alamatlandyrýar. Sanjym Oksford uniwersitetiniň Sanjym işläp taýýarlamak toparynyň we uniwersitetiň ýanyndaky Pandemiýa ylymlary institutynyň alymlary tarapyndan döredildi. Alymlar topary geljekki hepdelerde meýletinçileri hasaba almagy we olara sanjym etmegi dowam etdirer. Şol bir wagtyň özünde sanjymyň howpsuzlygyny we onuň döredýän immun jogabyny bahalandyrmak üçin gatnaşyjylara gözegçilik ediler.
Alymlar sanjym-dalaşgäriň konsepsiýadan kliniki synaglara çenli bary-ýogy sekiz hepdäniň içinde işlenip taýýarlanylandygyny bellediler. Munuň mümkin bolmagy Oksford uniwersitetiniň Kliniki bioöndüriş merkezi, Hindistanyň Serum instituty we beýleki hyzmatdaşlaryň arasyndaky hyzmatdaşlygyň netijesi boldy. Synag epidemiýalara taýýarlyk boýunça innowasiýalar koalisiýasy tarapyndan maliýeleşdirilýär. Bu iş Oksford uniwersitetiniň we Hindistanyň Serum institutynyň gatnaşmagynda amala aşyrylýan, umumy bahasy 8,6 million ABŞ dollary bolan maksatnamanyň çäklerinde geçirilýär hem-de Bundibugýo Ebola wirusyna garşy sanjymlary işläp taýýarlamagy çaltlandyrmaga gönükdirilendir. Uniwersitetiň maglumatlaryna görä, degişli gözegçilik edaralarynyň rugsady alnan halatynda Ugandadaky hyzmatdaşlar bilen sanjymyň indiki kliniki synaglaryna taýýarlyk işleri hem alnyp barylýar.
Ilkinji gezek Kongo Demokratik Respublikasynda (KDR) hasaba alnan ojagyň ýerleşen ýeriniň ady bilen atlandyrylan Bundibugýo Ebola wirusy Ebola wirusynyň alty görnüşiniň biridir. Ol ýokary ölüm howpy bilen häsiýetlenýän agyr gemorragik gyzzyrma döredýär. 17-nji maýda Bütindünýä Saglygy Goraýyş Guramasy (BSGG) Kongo Demokratik Respublikasynda we Ugandada Bundibugýo wirusy sebäpli ýüze çykan Ebola gyzzyrmasynyň epidemiýasynyň halkara ähmiýetli jemgyýetçilik saglygy goraýşy boýunça adatdan daşary ýagdaýdygyny yglan etdi. Häzirki wagtda Bundibugýo wirusyna garşy tassyklanan ýörite bejeriş serişdeleri ýa-da sanjymlar ýok.
CCTV+ agentliginiň habar bermegine görä, kliniki synaglaryň üstünlikli başlanmagy ýakyn geljekde lukmanlaryň bu howply ýokanja garşy täsirli serişdä eýe boljakdygyna umyt döredýär. Şeýle hem sanjym işläp taýýarlamak boýunça halkara hyzmatdaşlygynyň dünýäniň dürli künjeklerinde adamlaryň janyny halas etmegini dowam etdirjekdigi bellenilýär.
