Türkmenistanly talyp ÝHHG-niň Tomusky žurnalistika mekdebi – 2026 okuwyna gatnaşdy
Türkmenistanyň DIM-niň Halkara gatnaşyklary institutynyň Halkara žurnalistika fakultetiniň 1-nji ýyl talyby Ýusup Orazow ÝHHG-niň Tomusky žurnalistika mekdebi – 2026 okuwyna gatnaşdy. Bilim maksatnamasy 28-nji iýundan 12-nji iýula çenli Täjigistanda geçirildi.
Taslama ÝHHG-niň Duşenbedäki Maksatnama edarasynyň guramagynda we Ýewropa Bileleşiginiň Täjigistandaky wekilhanasynyň goldawy bilen Merkezi Aziýa ýurtlaryndan ýaş hünärmenler we geljekki žurnalistler üçin guraldy. Maksatnama gatnaşmak üçin sebitiň öňdebaryjy ýokary okuw mekdeplerinden bary-ýogy 20 talyp saýlanyp alyndy.
Okuw maksatnamasy hünär etikasynyň standartlaryna, media sowatlylygyny ösdürmäge we galp maglumatlara garşy göreşmegiň usullaryna bagyşlandy. Amaly sapaklaryň çäginde gatnaşyjylar Safina döwlet teleýaýlymyna baryp gördüler. Olar studiýalaryň işi, göni ýaýlymyň aýratynlyklary hem-de habar gepleşikleriniň taýýarlanyş prosesi bilen tanyşdylar.
Okuwy üstünlikli tamamlandan soň, Ýusup Orazowa resmi halkara şahadatnama gowşuryldy. Taslama Merkezi Aziýanyň ýaş media hünärmenleriniň tejribe alyşmagy we hünär gatnaşyklaryny ýola goýmagy üçin möhüm meýdança boldy.
ORIENT
